သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ သစ်တောဦးစီးဌာန၏ အစီအစဉ်အရ ကိုရီးယားနိုင်ငံ အထောက်အပံ့ဖြင့် ဆောင်ရွက်ပေးသည့် ဆေးပေးခန်းအား သစ်တောဦးစီးဌာန ၊ သစ်တောသုတေသနဌာန(ရေဆင်း)၌ ၂၀၁၅ ခုနှစ်တွင် ဖွင့်လှစ်ထားရှိပြီး ကိုရီ:ယားနိုင်ငံမှ ကျန်းမာရေးစောင့်ရှောက်မှုအဖွဲ့များသည် သစ်တောသုတေသနဌာနသို့ နှစ်စဉ်လာ ရောက်၍ ဝန်ထမ်းများအား ကျန်းမာရေးစစ်ဆေးပေးခြင်း၊ ဆေးကုသပေးခြင်းလုပ်ငန်းများ ဆောင်ရွက်ပေးခဲ့ပါသည်။

          ယခုအခါ ကိုရီးယားနိုင်ငံ၊ ချွန်းဘွတ် အမျိုးသားဆေးရုံမှ အငြိမ်းစားပါမောက္ခ Dr.Yang Kyung Mou ဦးဆောင်သော ဆရာဝန်(၃)ဦး၊ ဆေးမှူးနှင့်သူနာပြု(၇)ဦး စုစုပေါင်း(၁၀)ဦးပါဝင် သော ဆေးပညာရှင်အဖွဲ့သည် သစ်တောဦးစီးဌာန၊ သစ်တောသုတေသနဌာနသို့လာရောက်၍ ၂၀၁၇ ခုနှစ်၊ ဇူလိုင်လ(၁၁ ရက်နေ့မှ ၁၆)ရက်​နေ့အထိ ဝန်ထမ်းများအား ကျန်းမာရေးစောင့်ရှောက် မှုလုပ်ငန်းများ ဆောင်ရွက်ပေးလျက်ရှိပါသည်။

          ကိုရီးယားနိုင်ငံ ကျန်းမာရေးစောင့်ရှောက်မှုအဖွဲ့မှ ခွဲစိတ်ရောဂါ၊ မျက်စိရောဂါများ၊ ပလပ်စတစ်ဆာဂျရီလုပ်ငန်း၊ ဖျားနာရောဂါ၊ ဆီးချို၊ သွေးချို၊ အာရုံကြောရောဂါများ၊ သွေးတိုးရောဂါများ၊ စစ်ဆေးကုသပေးခြင်းနှင့် အထွေထွေကျန်းမာရေး စစ်ဆေးခြင်းလုပ်ငန်းများ ကို အခမဲ့ ကူညီဆောင်ရွက်ပေးနေပြီဖြစ်ပါသည်။

          အဆိုပါခရီးစဉ်တွင် သစ်တောသုတေသနဌာနတွင်သာမက (၁၂-၇-၂၀၁၇)နေ့လည်ပိုင်းနှင့် (၁၃-၇-၂၀၁၇)ရက်နေ့များတွင် သစ်တောဦးစီးဌာန၊ ညွှန်ကြားရေးမှူးချုပ်ရုံးမှ ဝန်ထမ်းများအား ကျန်းမာရေးစောင့်ရှောက်မှုလုပ်ငန်းများ ဆောင်ရွက်ပေးသွားမည်ဖြစ်ကြောင်း သတင်းရရှိပါသည်။