ဒေသခံပြည်သူအစုအဖွဲ့ပိုင် သစ်တောများတည်ထောင်၍ သစ်တောထွက်ပစစည်းများ ထုတ်ယူခြင်းဖြင့် သဘာဝသစ်တောများအပေါ် မှီခိုမှုလျော့နည်းလာစေရန်၊ ဒေသခံပြည်သူအစုအဖွဲ့ပိုင် သစ်တောများတွင် သီးနှံသစ်တောရောနှော စိုက်ပျိူးခြင်းအားဖြင့် သစ်တောထွက်ပစစည်းနှင့် စားသုံးသီးနှံနှစ်မျိုးစလုံး အကျိုးခံစားနိုင်ကြခြင်းဖြင့် ကျေးလက်ဒေသဖွံ့ဖြိုးရေးနှင့် ဆင်းရဲနွမ်းပါးမှုလျော့ချရေးအား အထောက်အကူဖြစ်စေရန်၊ ဒေသခံပြည်သူများသစ်တောလုပ်ငန်းများတွင် ပူးပေါင်းပါဝင်လာစေရန်နှင့် အစုအဖွဲ့ပိုင်သစ်တောလုပ်ငန်းများအကြောင်း ပိုမိုကျယ်ပြန့်စွာ သိရှိလာစေရန်ရည်ရွယ်လျက် ဒေသခံပြည်သူအစုအဖွဲ့ပိုင် သစ်တောပညာဖွံ့ဖြိုးမှု သင်တန်းအမှတ်စဥ်(၂ဝ)ကို မကွေးတိုင်းဒေသကြီး သစ်တောဦးစီးဌာန၊ ညွန်ကြားရေးမှူးရုံး အစည်းအဝေးခန်းမတွင် (၉-၉-၂ဝ၁၃)ရက်နေ့မှ (၂ဝ-၉-၂ဝ၁၃)ရက်နေ့အထိ ဖွင့်လှစ်သင်ကြားပို့ချခဲ့ပါသည်။

အဆိုပါသင်တန်းတွင် ဗဟိုသစ်တောလုပ်ငန်းဖွံ့ဖြိုးမှု လေ့ကျင့်ပညာပေးရေးသင်တန်းကျောင်း၊ ပုသိမ်ကြီးမှ ဉီးစီးအရာရှိ သင်တန်းဆရာ(၄)ဦးတို့က စာတွေ့လက်တွေ့ သင်ကြားပို့ချခဲ့ပြီး မကွေးခရိုင်မှ ကျေးလက်ပြည်သူအဆင့် သင်တန်းသား(၅)ဦး၊ မင်းဘူးခရိုင်မှ(၄)ဦး၊ ပခုကကူခရိုင်မှ(၄)ဦး၊ သရက်ခရိုင်မှ(၄)ဦးနှင့် ဂန့်ဂေါခရိုင်မှ(၃)ဦး စုစုပေါင်းသင်တန်းသား(၂ဝ)ဦး တက်ရောက်ခဲ့ကြပါသည်။

သင်တန်းကာလအတွင်း ဒိုချပ်ကင်းပိုးမွေးမြူခြင်းနှင့် သဘာဝမြေသြဇာ ပြုလုပ်ပုံအဆင့်ဆင့်၊ အပင်ခနပိုင်းမျိုးပွားခြင်းနှင့် ပျိုးဥယျာဉ်တည်ဆောက်ခြင်း၊ စံပြအစုအဖွဲ့ပိုင်သစ်တောစိုက်ခင်းနှင့် သစ်တောစိုက်ခင်းတည်ထောင်ခြင်းတို့အား (၁၇-၉-၂ဝ၁၃)ရက်နေ့မှ (၁၉-၉-၂ဝ၁၃)ရက်နေ့အထိ လက်တွေ့လုပ်ကိုင် ဆောင်ရွက်ခဲ့ကြပြီး မြို့သစ်မြို့နယ်၊ တောင်တွင်းကြီးမြို့နယ်၊ နတ်မောက်မြို့နယ်နှင့် မကွေးမြို့နယ်တို့တွင်ရှိသော သစ်တောဦးစီးဌာနနှင့် အပူပိုင်းဒေသစိမ်းလန်းစိုပြည်ရေးဦးစီးဌာနတို့မှ သစ်တောစိုက်ခင်းများနှင့် ဒေသခံပြည်သူအစုအဖွဲ့ပိုင်သစ်တောများအား ကွင်းဆင်းလေ့လာခဲ့ကြကြောင်း သတင်းရရှိပါသည်။