သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ သစ်တောဦးစီးဌာန၊ AFoCO RETC စီမံကိန်း သင်တန်းကျောင်းသည် AFoCO အဖွဲ့ဝင်နိုင်ငံများမှ သင်တန်းသားများဖိတ်ကြား၍ ကာလတိုပုံမှန်သင်တန်းနှင့် သစ်တောဆိုင်ရာ တိုးချဲ့ပညာပေးအစီအစဉ်များ၊ ဒေသခံ ပြည်သူများ၏ လူမှုစီးပွားများကို အထောက်အကူပြု သင်တန်းများအပြင် မျိုးဆက်သစ် လူငယ်များအား သစ်တောနှင့် ပတ်ဝန်းကျင်ထိန်းသိမ်းရေးဆိုင်ရာ အသိပညာမျှဝေသည့် အစီအစဉ်များကိုနှစ်စဉ် ဆောင်ရွက် ကျင်းပရာ ဇွန်၂၃ နံနက် ၉နာရီက AFoCO RETC သင်တန်းကျောင်း ၌ တက္ကသိုလ် ကျောင်းသား/ သူများအား သဘာဝပတ်ဝန်းကျင် ထိန်းသိမ်းရေး ဆိုင်ရာ သိကောင်းစရာများကို ဟောပြောသည်။ အဆိုပါ အစီအစဉ်ကို ကုလသမဂ္ဂထာဝစဉ်ဖွံ့ဖြိုးတိုးတက်ရေး အောက်ဖော်ပြပါ ရည်မှန်းချက် (၁၇)ရပ်နှင့်အညီ ကျင်းပခဲ့ရာသဘာဝ ပတ်ဝန်းကျင်နှင့် ဇီဝမျိုးစုံမျိုးကွဲများ ထိန်းသိမ်းရေး၊စွမ်းအင်ချွေတာရေး၊နိုင်ငံသားကောင်းဖြစ်စေရေး၊ စိတ်ချမ်းသာ၊ကိုယ်ကျန်းမာရေး၊အမိုက်စနစ်တကျစွန့်ပစ်ရေး၊စွန့်ပစ်ပစ္စည်းစီမံခန့်ခွဲရေး၊ကမ်ရိုးတန်း ဒေသဂေဟစနစ်များ ထိန်းသိမ်းရေး၊ သယ်ယူပို့ဆောင်ရေး၊ ကျောင်းပတ်ဝန်းကျင်စိမ်းလန်းစိုပြေရေး၊ရေသယံဇာတစီမံခန့်ခွဲရေး၊ရာသီဥတုပြောင်းလဲမူနှင့် လိုက်လျောညီထွေရှိစွာ နေထိုင်နိုင်ရေးEco-school အစီအစဉ်တွင် တက္ကသိုလ်ကျောင်းသား/သူများအား သဘာဝပတ်ဝန်းကျင် ထိန်းသိမ်းရေး ဆိုင်ရာ သိကောင်းစရာများ ကိုAFoCO RETC သင်တန်းကျောင်း၊လက်ထောက်ညွှန်ကြားရေးမှူး ဦးသိန်းသန်းထွန်းက ရှင်းလင်း ဟောပြောသည်။ သဘာဝပတ်ဝန်းကျင်ထိန်းသိမ်းရေး အသိပညာမျှဝေခြင်း”အစီအစဉ်ကို ၂၀၂၅-၂၀၂၆ ဘဏ္ဍာနှစ် အတွက် တက္ကသိုလ် ကျောင်းသား/ သူများအား (၂)ကြိမ်၊ ရွှေပြည်သာမြို့နယ်အတွင်းရှိ အခြေခံပညာ အထက်တန်းကျောင်းများမှ ကျောင်းသား/သူများအား (၁၀)ကြိမ်နှင့် အခြေခံပညာဆရာ/ ဆရာမများ အား (၂)ကြိမ်၊ စုစုပေါင်း (၁၄)ကြိမ် စီစဉ်ကျင်းပရန် လျာထားခဲ့ပြီး ဒုတိယ အကြိမ်အဖြစ် ဇွန် ၂၃ ရက် နံနက်၉ နာရီမှ နေ့လည် ၁၂နာရီခွဲအထိ AFoCO RETC သင်တန်းကျောင်း ၌ စီစဉ်ကျင်းပခဲ့ရာ နည်းပညာတက္ကသိုလ် (မှော်ဘီ)မှ ပါမောက္ခချုပ်နှင့် ကြီးကြပ်သူ ဆရာ/ ဆရာမများ၊ ကျောင်းသား/ သူများ စုစုပေါင်း(၉၀)ဦး တက်ရောက်ခဲ့ကြသည်။ ထို့နောက်တက်ရောက်လာသည့် ကျောင်းသား၊ကျောင်းသူများအား RETC သင်တန်းကျောင်းနှင့် လေ့လာရေးသစ်တော၊ FRI စခန်းအမှတ်(၉)ရှိ သစ်တော ပျိုးဥယျာဉ်တို့အား လေ့လာခြင်း၊ အမှတ်တရ စုပေါင်းသစ်ပင်စိုက်ပျိုး ခြင်းများ ဆောင်ရွက်ခဲ့ကာ အမှတ်တရလက်ဆောင်သင်တန်းကျောင်းပုံ ပန်းချီကားအား ပေးအပ် ခဲ့ပါကြောင်း သတင်းရရှိသည်။