ဇီဝမျိုးစုံမျိုးကွဲဆိုင်ရာ ဆဌမအကြိမ်မြောက် နိုင်ငံအဆင့်အစီရင်ခံစာ 6^th National Report - NR မူကြမ်းအပေါ် စိစစ်သုံးသပ်ခြင်းအလုပ်ရုံဆွေးနွေးပွဲကို ၅-၁၀-၂၀၁၈ ရက်နေ့၊ နံနက်(၀၈:၃၀) နာရီအချိန်၌ အမရာဟိုတယ်၊ နေပြည်တော်တွင် ကျင်းပရာ သယံဇာတနှင့် သဘာဝပတ်ဝန်းကျင်ထိန်း သိမ်းရေးဝန်ကြီးဌာန၊ သစ်တောဦးစီးဌာန ညွှန်ကြားရေးမှူးချုပ် ဒေါက်တာညီညီကျော် တက်ရောက်၍ အဖွင့်အမှာစကားပြောကြားပါသည်။

            ညွှန်ကြားရေးမှူးချုပ်က အမှာစကားပြောကြားရာတွင် မြန်မာနိုင်ငံသည် Convention on Biological Diversity (CBD) ၏ အဖွဲ့ဝင်နိုင်ငံတစ်နိုင်ငံအဖြစ် ၁၉၉၄ ခုနှစ်၌ အတည်ပြုလက်မှတ် ရေးထိုးခဲ့ပြီး ဇီဝမျိုးစုံမျိုးကွဲထိန်းသိမ်းရေးဆိုင်ရာ လုပ်ငန်းများအတွက် နိုင်ငံအဆင့် ဇီဝမျိုးစုံမျိုးကွဲ ဆိုင်ရာ မဟာဗျူဟာနှင့် လုပ်ငန်းစီမံချက်(NBSAP) ကိုရေးဆွဲအကောင်အထည်ဖော်လျက်ရှိပြီး တိုးတက်ဆောင်ရွက်မှုကို ဇီဝမျိုးစုံမျိုးကွဲဆိုင်ရာ နိုင်ငံအဆင့် အစီရင်ခံစာများရေးသား၍ CBD အတွင်းရေးမှူး ရုံးသို့ (၄)နှစ်တစ်ကြိမ် ပေးပို့လျက်ရှိပြီး ပဉ္စမအကြိမ်မြောက် နိုင်ငံအဆင့်အစီရင်ခံစာကို ၂၀၁၄ ခုနှစ်၌ တင်သွင်းခဲ့ပါကြောင်း၊

            မြန်မာနိုင်ငံသည် ဇီဝမျိုးစုံမျိုးကွဲပေါကြွယ်လှသည့်နိုင်ငံဖြစ်ပါကြောင်း၊ ဇီဝမျိုးစုံမျိုးကွဲသယံဇာ တများကို ထိန်းသိမ်းရာတွင် CBD ၏ မဟာဗျူဟာရည်မှန်းချက်များ၊ မိမိတို့နိုင်ငံ၏ ဇီဝမျိုးစုံမျိုးကွဲ ဆိုင်ရာ မဟာဗျူဟာရည်မှန်းချက်များနှင့်အညီ ဇီဝမျိုးစုံမျိုးကွဲထိန်းသိမ်းရေး၊ စီမံအုပ်ချုပ်ရေးနှင့် အသုံး ပြုရေးတို့တွင် ရေရှည်တည်တံ့စေရန်အတွက် ၂၀၁၁ ခုနှစ်၌ နိုင်ငံအဆင့်ဇီဝမျိုးစုံမျိုးကွဲဆိုင်ရာ မဟာဗျူ ဟာနှင့် လုပ်ငန်းစီမံချက်(NBSAP)ကို ရေးဆွဲခဲ့ပြီးနောက် ၂၀၁၅ ခုနှစ်၌ ပြန်လည်ပြင်ဆင်ခဲ့ပါကြောင်း၊

            ထို့အပြင် UNDP – GEF အထောက်အပံ့နှင့် ကနေဒါနိုင်ငံသားပညာရှင်ကိုဌားရမ်းပြီး ကနဦး အလုပ်ရုံဆွေးနွေးပွဲကို ၂၀၁၈ခုနှစ်၊ ဖေဖော်ဝါရီလ(၂၇)ရက်နေ့မှာ နေပြည်တော်တွင် ကျင်းပခဲ့ပါကြောင်း၊ NBSAP အကောင်အထည်ဖော်ရာတွင်  ကြီးကြပ်ညှိနှိုင်းရန်အတွက် ဖွဲ့စည်းထားသည့် အမျိုးသား အဆင့် ဇီဝမျိုးစုံမျိုးကွဲထိန်းသိမ်းရေးကော်မတီ (NBCC)အောက်တွင် ဖွဲ့စည်းထားသည့် ဘာသာရပ် ဆိုင်ရာလုပ်ငန်းအဖွဲ့ (၅)ဖွဲ့မှ အဖွဲ့ဝင်များတက်​ရောက်ခဲ့ပါကြောင်း၊

            ထို့နောက် ၂၀၁၈ ခုနှစ်၊ ဇွန်လ(၂၉)ရက်နေ့၌ 6^th NR ရေးဆွဲမှု လက်ရှိအခြေအနေ၊ အချက်အ လက်လိုအပ်ချက်များ ဆွေးနွေးနိုင်ရန် အစည်းအဝေးကို နေပြည်တော်တွင် ဒုတိယအကြိမ်ကျင်းပခဲ့ပါ ကြောင်း၊ သစ်တောဦးစီးဌာနအနေနှင့် ဆက်စပ်ဝန်ကြီးဌာနများ၊ မိတ်ဖက်အဖွဲ့အစည်းများထံမှ သက် ဆိုင်သည့်အချက်အလက်များ စုစည်းခြင်း၊ ပြုစုပေးပို့ခြင်းတို့ဆောင်ရွက်ခဲ့ပြီး 6^th NR ရေးသားရေး အတွက် သက်ဆိုင်ရာပုဂ္ဂိုလ်များနှင့် စဉ်ဆက်မပြတ် ဆက်သွယ်ပေးပို့ခဲ့ပါသဖြင့်  ယခုအခါ 6^th NR ၏ ပထမမူကြမ်းကို ရေးသားပြုစုပြီးဖြစ်ပါကြောင်း၊ အဆိုပါ မူကြမ်းတွင် ထည့်သွင်းရေးဆွဲ သုံးသပ်ထား သည့် အချက်အလက်များနှင့်ပတ်သက်ပြီး တက်ရောက်လာကြသည့် ဌာနဆိုင်ရာ ပုဂ္ဂိုလ်များမှ ပြင်ဆင် ခြင်း၊ ဖြည့်စွက်ခြင်း၊ အတည်ပြုခြင်းတို့ကို ယနေ့ကျင်းပသည့် အလုပ်ရုံဆွေးနွေးပွဲတွင် ဆောင်ရွက်ပေး ကြရန် အကြံပြုတိုက်တွန်းလိုပါကြောင်း၊

            ယနေ့ကျင်းပသည့် အလုပ်ရုံဆွေးနွေးပွဲသည် UNDP က ပြုစုထားသည့် ပထမမူကြမ်းအပေါ် တွင် အကြံပြုဆွေးနွေးပွဲဖြစ်ပြီး ယနေ့အခမ်းအနားမှ ရရှိလာမည့် အချက်အလက်များနှင့်အညီ နောက်ဆုံးမူကြမ်းပြုစုပြီးနောက် အပြီးသတ်အစီရင်ခံစာအား CBD  သို့ ပေးပို့သွားမည်ဖြစ်ပါကြောင်း၊ တက်ရောက်လာကြသည့် ဌာနဆိုင်ရာများမှ ကိုယ်စားလှယ်များ၊ မိတ်ဖက်အဖွဲ့အစည်းများမှ ကိုယ်စား လှယ်များ၊ ဖိတ်ကြားထားသော ဧည့်သည်တော်များအနေနှင့် မိမိတို့နိုင်ငံ၏ ဇီဝမျိုးစုံမျိုးကွဲထိန်းသိမ်း ရေး နိုင်ငံတကာကတိကဝတ်များအပေါ် မည်မျှလိုက်နာဆောင်ရွက်လျက်ရှိသည်ကို သုံးသပ်တင်ပြမည့် 6^th NR ရေးသားပြုစုရေးလုပ်ငန်းအပေါ် အကြံပြုချက်၊ ဖြည့်စွက်ချက်၊ အတည်ပြုချက်များပေးနိုင်ရန်  ဝိုင်းဝန်းဆွေးနွေးပေးကြပါရန် ပြောကြားပါသည်။

အခမ်းအနားသို့ ဆက်စပ်ဝန်ကြီးဌာများမှ ကိုယ်စားလှယ်များ၊ သယံဇာတနှင့် သဘာဝပတ်ဝန်း ကျင်ထိန်းသိမ်းရေးဝန်ကြီးဌာနမှ ကိုယ်စားလှယ်များ၊ တက္ကသိုလ်များမှ ကိုယ်စားလှယ်များ၊ ပြည်တွင်း နှင့် နိုင်ငံတကာအစိုးရမဟုတ်သောအဖွဲ့အစည်းများမှ ကိုယ်စားလှယ်များ၊ CSO များ၊ FAO နှင့် UNDP မှ တာဝန်ရှိပုဂ္ဂိုလ်များ၊ ဖိတ်ကြားထားသည့် ဧည့်သည်တော်များ တက်ရောက်ကြပါသည်။