ခရိုင်သစ်တောအရာရှိများ စွမ်းဆောင်ရည်မြှင့်တင်ရေးသင်တန်းအမှတ်စဉ် (၁၀) သင်တန်းဆင်းပွဲ အခမ်းအနားကို (၂၁-၂-၂၀၂၅) ရက်၊ နံနက် (၀၈:၀၀)နာရီ အချိန်တွင် သစ်တောသုတေသနဌာန၊ စုဝေးခန်းမ၌ ကျင်းပရာ သစ်တောဦးစီးဌာန၊ ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများ၊ ဒုတိယညွှန်ကြားရေးမှူးများ၊ သစ်တောသုတေသနဌာနမှ သုတေသီများ၊ သင်တန်းဆရာများနှင့် သင်တန်းသားများတက်ရောက်ခဲ့ပါသည်။ ဦးစွာ ညွှန်ကြားရေးမှူးချုပ် ဒေါက်တာသောင်းနိုင်ဦးက အမှာစကားပြောကြားရာတွင် ယခုသင်တန်းအား သစ်တောထိန်းသိမ်းရေး၊ သစ်တောစီမံအုပ်ချုပ်ရေးနှင့်စဥ်ဆက်မပြတ်ဖွံဖြိုးတိုးတက်ရေး ဖော်ဆောင်ရာမှာ ပိုမိုထိရောက်အောင်မြင်ရေး၊ နိုင်ငံတော်ပြုပြင်ပြောင်းလဲမှုများတွင်ကိုယ်တိုင် ဦးဆောင်ပါဝင်နိုင်ရေး၊ တာဝန်ယူမှု တာဝန်ခံမှုရှိသောခေါင်းဆောင်ကောင်းများဖြစ်စေရေး ရည်ရွယ်ချက်များဖြင့်ဖွင့်လှစ်ပို့ချခဲ့ပါကြောင်း၊ သင်တန်းတွင်ဌာန အကြီးအကဲများအပါအဝင် ဆက်စပ်ဌာနများမှ တာဝန်ရှိသူ သင်တန်းဆရာများလည်းလာရောက်၍ စာတွေ့ လက်တွေ့သင်ကြားပို့ချဆွေးနွေးခဲ့ပါကြောင်း၊ အုပ်ချုပ်ရေး၊ လုပ်ငန်းကျွမ်းကျင်မှု၊ စည်းရုံးရေးစွမ်းရည်များတိုးတက်စေရေးကို သင်တန်းမှ လေ့ကျင့်သင်ကြားခဲ့ပါကြောင်းနှင့် ခရိုင်သစ်တောအရာရှိများအနေဖြင့် ပြောင်းလဲသည့် ခေတ်စနစ်၊ မူဝါဒ၊ ဥပဒေ ၊ လုပ်ထုံးလုပ်နည်းများနှင့်အညီ လိုက်လျောညီထွေဆောင်ရွက်ရန်၊ ပြည်သူများအားထားယုံကြည်ရသည့်နိုင်ငံ့ဝန်ထမ်းကောင်းဖြစ်စေရန်၊ ဌာနအကျိုး၊ နိုင်ငံ့အကျိုးကိုစွမ်းဆောင်ရည်မြင့်မားစွာကြိုးပမ်းဆောင်ရွက်ရန်မှာကြားပြီးနောက် သင်တန်းသားတစ်ဦးချင်းစီအလိုက် သင်တန်းဆင်းလက်မှတ်များပေးအပ်ချီးမြှင့်ခဲ့ပြီးပါကြောင်းသတင်းရရှိပါသည်။ ခရိုင်သစ်တောအရာရှိများ စွမ်းဆောင်ရည်မြှင့်တင်ရေး သင်တန်းအမှတ်စဉ်(၁၀)အား (၁၀-၂-၂၀၂၅ ရက်မှ ၂၁-၂-၂၀၂၅) ရက်အထိ ရက်သတ္တ(၂)ပတ်ကြာ ဖွင့်လှစ်ခဲ့ပြီးသင်တန်းသား(၂၀)ဦးတက်ရောက်ခဲ့ပါကြောင်း သတင်းရရှိပါသည်။