သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ ပြည်ထောင်စုဝန်ကြီး ဦးခင်မောင်ရီသည် ၃၀-၁၂-၂၀၂၃ ရက်နေ့ နံနက်ပိုင်းတွင် ဧရာဝတီတိုင်းဒေသကြီး၊ ကျုံပျော်ခရိုင်၊ ရေကြည်မြို့၊ စိမ်းလဲ့ရေကြည်ခန်းမတွင် ကြိမ်/ဝါးအချောထည် လုပ်ငန်းရှင်များနှင့်တွေ့ဆုံသည်။ တွေ့ဆုံစဉ် ပြည်ထောင်စုဝန်ကြီးက မြန်မာနိုင်ငံတွင် နှစ်စဉ်ထုတ်လုပ်နိုင်သော ဝါးလုံးရေ ၃၀၁ သန်းနှင့် ကြိမ်လုံးရေ ၇၇ သန်းရှိကြောင်း၊ ဝါးနှင့်ကြိမ်အချောထည်ပစ္စည်းများကို ပြည်တွင်း စျေးကွက်တွင်သာမက ပြည်ပစျေးကွက်အထိ တင်ပို့၍ ပြည်တွင်း ပြည်ပဝင်ငွေများ ရှာဖွေပေးနေ သည့်အပြင် ဒေသခံပြည်သူများအတွက်လည်း အလုပ်အကိုင်အခွင့်အလမ်းများ ဖန်တီးပေးလျက်ရှိ ကြောင်း၊ ကြိမ်နှင့်ဝါး အချောထည် MSME များ ယခုထက်ပို၍ ဖွံ့ဖြိုးတိုးတက်စေရေးအတွက် လုပ်ငန်းရှင်များ၏ လိုအပ်ချက်များအား ဝန်ကြီးဌာနမှ အတတ်နိုင်ဆုံး ဖြည့်ဆည်းဆောင်ရွက်ပေး မည်ဖြစ်ကြောင်း၊ အဆိုပါပုဂ္ဂလိကလုပ်ငန်းများ ဖွံ့ဖြိုးတိုးတက်စေရန် နည်းပညာနှင့် လူ့စွမ်းအား အရင်းအမြစ်တိုးတက်စေရေး၊ ကုန်ကြမ်းရရှိရေးနှင့် ထုတ်လုပ်ပြီးသော ကုန်ချောများတင်ပို့ရာတွင် အဆင်ပြေချောမွေ့မှုရှိစေရေးအတွက်ဌာနနှင့်လုပ်ငန်းရှင်များ ညှိနှိုင်းပေါင်းစပ်၍ ဆောင်ရွက်သွားရန် လိုကြောင်း ပြောကြားသည်။
ဆက်လက်၍ တက်ရောက်လာသော လုပ်ငန်းရှင်များက မိမိတို့ကဏ္ဍအလိုက် လုပ်ငန်း ဆောင်ရွက်နေမှု အခြေအနေများ၊ ကုန်ကြမ်းရရှိမှု၊ ကုန်ချောထုတ်လုပ်မှုနှင့် စျေးကွက်အခြေအနေ၊ တွေ့ကြုံရသော အခက်အခဲများနှင့်ပတ်သက်၍ ရှင်းလင်းတင်ပြကြပြီး တာဝန်ရှိသူများ၏ ဖြည့်စွက် ရှင်းလင်းတင်ပြမှုအပေါ် ပြည်ထောင်စုဝန်ကြီးက လိုအပ်သည်များ ပေါင်းစပ်ညှိနှိုင်း ဆောင်ရွက် ပေးသည်။
ထို့နောက်ပြည်ထောင်စုဝန်ကြီးသည် ရေကြည်မြို့နှင့် ငါးသိုင်းချောင်းမြို့ရှိ ဝါးနှင့်ကြိမ် အချောထည်ထုတ်လုပ်နေသည့် လုပ်ငန်းများသို့သွားရောက်၍ ကုန်ချောထုတ်လုပ်နေမှု အဆင့်ဆင့် အား ကြည့်ရှုစစ်ဆေးပြီး သိလိုသည်များမေးမြန်းကာ လိုအပ်သည်များ ပေါင်းစပ်ဆောင်ရွက်ပေး သည်။
မွန်းလွဲပိုင်းတွင် ပြည်ထောင်စုဝန်ကြီးသည် ပုသိမ်ခရိုင်၊ သာပေါင်းမြို့နယ်ရှိ ဇီးဖြူကွင်း ပျိုးဥယျာဉ်တွင် လူထုဖြန့်စိုက်ပျိုးရန်အတွက် သစ်မျိုး ၅ မျိုးဖြင့် ပျိုးပင် ၁၃၀၀၀ ပျိုးထောင်ထား ရှိမှု အခြေအနေအားလည်းကောင်း၊ လှေကြီးတက်ပျိုးဥယာဉ်အတွင်း သစ်မျိုး ၇ မျိုးဖြင့် ပျိုးပင် ၂၀၀၀၀ ပျိုးထောင်ထားရှိမှု အခြေအနေအား လည်းကောင်း၊ မြို့မပျိုးဥယျာဉ်တွင် သစ်မျိုး ၈ မျိုး ဖြင့် ပျိုးပင် ၂၆၇၀၀ ပင် ပျိုးထောင်ထားရှိမှု အခြေအနေတို့အား လည်းကောင်း လိုက်လံကြည့်ရှု စစ်ဆေးပြီး နှစ်စဉ် ၂ ပေအထက် ပျိုးပင်များ စဉ်ဆက်မပြတ်ရရှိစေရေးနှင့် စိုက်ပျိုးထားသော အပင်များ တစ်ပင်စိုက် တစ်ပင်ရှင်အောင် ကြိုးပမ်းဆောင်ရွက်သွားရန်မှာကြားသည်။ ထို့နောက် သာပေါင်းမြို့၊ မြို့နယ်သစ်တောဦးစီးဌာနရုံးတွင် တာဝန်ရှိသူများက လုပ်ငန်းဆောင်ရွက်နေမှု အခြေအနေများအား ရှင်းလင်းတင်ပြရာ ပြည်ထောင်စုဝန်ကြီးက လိုအပ်သည်များ မှာကြားသည်။
ညနေပိုင်းတွင် ပြည်ထောင်စုဝန်ကြီးသည် ပုသိမ်မြို့ရှိ မြို့နယ်သစ်တောဦးစီးဌာနရုံးသို့ သွားရောက်၍ ဝန်ထမ်းများနှင့်တွေ့ဆုံကာ လိုအပ်သည်များ ဖြည့်ဆည်းဆောင်ရွက်ပေးသည်။ ထို့နောက် ပြည်ထောင်စုဝန်ကြီးသည် ပုသိမ်မြို့ရှိ မြို့မပျိုးဥယျာဉ်အတွင်း သစ်မျိုး ၁၈ မျိုးဖြင့် ပျိုးပင် ၃၈၇၀၀ ပျိုးထောင်ထားရှိမှု အခြေအနေအား လှည့်လည်ကြည့်ရှုစစ်ဆေးခဲ့ကြောင်း သတင်းရရှိသည်။