ကျေးလက်ဒေသဖွံ့ဖြိုးမှု အထောက်အကူပြု ဝါးစိုက်ပျိုးပြုစုပျိုးထောင်ခြင်း၊ မျှစ်ချဉ်၊ မျှစ်ချို၊ မျှစ်ခြောက်လက်တွေ့ပြုလုပ်ခြင်းနှင့် ဈေးကွက်ချိတ်ဆက်ခြင်း သင်တန်းဖွင့်ပွဲအခမ်းအနားကို ယနေ့ နံနက်ပိုင်းတွင် သစ်တောသုတေသနဌာန၊ ရေဆင်း၊ စုဝေးခန်းမတွင် ကျင်းပပြုလုပ်ရာ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ ပြည်ထောင်စုဝန်ကြီး ဦးခင်မောင်ရီ တက်ရောက်အဖွင့်အမှာစကားပြောကြားသည်။
ပြည်ထောင်စုဝန်ကြီးက ယခုဖွင့်လှစ်သည့် သင်တန်းသည် သစ်တောဦးစီးဌာနနှင့် သစ်တော များပြန်လည်တည်ထောင်ခြင်းနှင့် ထာဝစဉ်တည်တံ့သော သစ်တောစီမံအုပ်ချုပ်မှုဆိုင်ရာ အာရှနှင့် ပစိဖိတ်ဒေသကွန်ယက်အဖွဲ့ - APFNetတို့ ပူးပေါင်းဆောင်ရွက်နေသည့် “မဲခေါင်ဒေသ၊ မြန်မာနိုင်ငံ တွင် သစ်တောဂေဟစနစ်များအား ဘက်စုံစီမံအုပ်ချုပ်ခြင်းနှင့် သရုပ်ပြခြင်းစီမံကိန်း”၏ လုပ်ငန်းစဉ် တစ်ခုဖြစ်ကြောင်း၊ မြန်မာနိုင်ငံလူဦးရေ၏ ၇၀ ရာခိုင်နှုန်းကျော်သည် ကျေးလက်နေ ပြည်သူများ ဖြစ်ကြပြီး စားဝတ်နေရေးအတွက် ဝါးအပါအဝင် သစ်မဟုတ်သော သစ်တောထွက် ပစ္စည်းများ အပေါ်တွင် မှီခိုအားထားနေကြရကြောင်း၊ မြန်မာနိုင်ငံသည် ကမ္ဘာပေါ်တွင် ဝါးပေါက်ရောက်မှု တတိယအများဆုံးနိုင်ငံဖြစ်ပြီး နှစ်စဉ် ဝါးတောထွက်နှုန်းမှာ အလုံးရေ ၃၀၁ သန်းရှိကြောင်း၊ မျှစ် ထုတ်လုပ်မှုအနေဖြင့် တစ်နှစ်လျှင် ပျှမ်းမျှ ပိဿာ ၂၄ သိန်းခန့်ရှိကြောင်း၊
ဝါးစိုက်ခင်းများ တည်ထောင်ခြင်း၊ မျှစ်ထုတ်လုပ်ခြင်း၊ ဝါးအခြေခံ လက်မှုပစ္စည်းနှင့် တန်ဖိုးမြှင့် အချောထည်များ ထုတ်လုပ်ခြင်းဖြင့် ဒေသခံများအတွက် အလုပ်အကိုင် အခွင့်အလမ်း များစွာ ဖန်တီးပေးလျက်ရှိသည့်အပြင် သွင်းကုန်အစားထိုးရန်နှင့် ပို့ကုန်မြှင့်တင်နိုင်ရေး ဒေသ ထွက်ကုန်ကြမ်းများကို အခြေခံသည့် MSME လုပ်ငန်းများ ဖွံ့ဖြိုးတိုးတက်ရေးအတွက်လည်း ဖော်ဆောင်လျက်ရှိကြောင်း၊ ယခု သင်တန်းတွင် စီမံကိန်းဧရိယာမှဒေသခံများအား ရေရှည် တည်တံ့သော မျှစ်ထုတ်ယူခြင်း၊ ကုန်ကြမ်းမှကုန်ချော ထုတ်လုပ်ရောင်းချခြင်းနှင့် စျေးကွက် ချိတ်ဆက်ခြင်းဆိုင်ရာ နည်းစနစ်များကို စာတွေ့လက်တွေ့ ၅ ရက် ပို့ချသွားမည်ဖြစ်သဖြင့် လက်တွေ့နယ်ပယ်တွင် အကျိုးရှိမည့် သင်တန်း တစ်ခု ဖြစ်ကြောင်းပြောကြားသည်။ ထို့နောက် ပြည်ထောင်စုဝန်ကြီးသည် သင်တန်းသားများအား ရင်းရင်းနှီးနှီးလိုက်လံနှုတ်ဆက်၍ မှတ်တမ်းတင် စုပေါင်းဓာတ်ပုံ ရိုက်ကူးသည်။
ဆက်လက်၍ ပြည်ထောင်စုဝန်ကြီးသည် ပတ်ဝန်းကျင်ထိန်းသိမ်းရေးဦးစီးဌာန၊ အစည်း အဝေးခန်းမတွင် ကျင်းပပြုလုပ်သော နယ်စပ်ဖြတ်ကျော် မီးခိုးမြူငွေ့ညစ်ညမ်းမှု ထိန်းချုပ်ရေး ဆိုင်ရာသင်တန်းနှင့် လေထုအရည်အသွေး စောင့်ကြည့်တိုင်းတာရေး ကိရိယာကိုင်တွယ်ခြင်း သင်တန်း ဖွင့်ပွဲသို့ တက်ရောက်၍ အမှာစကားပြောကြားရာတွင် နယ်စပ်ဖြတ်ကျော်မီးခိုးမြူငွေ့ ညစ်ညမ်းမှုနှင့်ပတ်သက်၍ လေထုအရည်အသွေး စောင့်ကြည့်တိုင်းတာစစ်ဆေးခြင်းနှင့် ဆန်းစစ် ခြင်းဆိုင်ရာ စီမံကိန်းသည် ၂၀၂၁ ခုနှစ်မှ ၂၀၂၄ ခုနှစ်အထိ မဲခေါင်-လန်ချန်း ပူးပေါင်း ဆောင်ရွက်လျက်ရှိသော စီမံကိန်းဖြစ်ကြောင်း၊ ယခုသင်တန်းအား လေထုညစ်ညမ်းမှုကာကွယ် ထိန်းချုပ်ခြင်းဆိုင်ရာ စောင့်ကြည့်တိုင်းတာစစ်ဆေးခြင်း လုပ်ငန်းများတွင် စွမ်းဆောင်ရည်မြင့်မား လာစေရန်၊ လေထုညစ်ညမ်းမှုကြောင့် ဖြစ်ပေါ်လာမည့် အကျိုးဆက်များအား ကြိုတင်ကာကွယ် နိုင်ရန်နှင့် ကောင်းမွန်သော ပတ်ဝန်းကျင်ဆိုင်ရာ အရည်အသွေး စောင့်ကြည့်လေ့လာခြင်း စနစ်တစ်ခု ပေါ်ပေါက်လာစေရန် ရည်ရွယ်ကျင်းပခြင်းဖြစ်ကြောင်း၊
ကမ္ဘာတစ်ဝှမ်းတွင် လေထုညစ် ညမ်းမှုကြောင့် နှစ်စဉ် လူဦးရေ ၇ သန်းခန့် သေဆုံးနေကြ ရပြီး ၂၄ သန်းခန့်မှာ အိမ်တွင်းလေထုညစ်ညမ်းမှုအန္တရာယ်နှင့် ကြုံတွေ့နေရကြောင်း၊ လေထု ညစ်ညမ်းမှုသည် နယ်နမိတ်ဖြတ်ကျော်သည့် သဘာဝရှိသည့်အတွက် လေထုညစ်ညမ်းမှု ပြဿနာများအား ဖြေရှင်းရန်အတွက် ဒေသအဆင့်၊ အမျိုးသားအဆင့်နှင့် နိုင်ငံတကာအဆင့် ပူးပေါင်း၍ အတူတကွဆောင်ရွက်သွားရမှာြဖစ်ကြောင်း၊ မြန်မာနိုင်ငံအနေဖြင့် နယ်စပ်ဖြတ်ကျော် မီးခိုးမြူငွေ့ညစ်ညမ်းမှု ထိန်းချုပ်ရေးဆိုင်ရာ အာဆီယံ သဘောတူညီချက်ကို ၂၀၀၂ ခုနှစ်တွင် သဘောတူလက်မှတ်ရေးထိုးခဲ့ပြီး အာဆီယံနိုင်ငံများနှင့် အတူ ပူးပေါင်းဆောင်ရွက်လျက်ရှိကြောင်း၊ ယခုသင်တန်းတွင် သင်တန်းသား ၆၂ ဦးအား စာတွေ့ လက်တွေ့ သင်ကြားပေးမည်ဖြစ်ပြီး သင်တန်းသားများအနေဖြင့် လက်တွေ့နယ်ပယ်တွင် အကျိုးရှိစွာ ထိထိ‌ရောက်ရောက် အသုံးချ နိုင်ရေးအတွက် ကြိုးစားလေ့လာသင်ယူသွားကြရန် မှာကြားသည်။ ထို့နောက် ပြည်ထောင်စု ဝန်ကြီးသည် သင်တန်းသားများအား ရင်းရင်းနှီးနှီး လိုက်လံ နှုတ်ဆက်၍ မှတ်တမ်းတင် စုပေါင်း ဓာတ်ပုံ ရိုက်ကူးခဲ့ကြောင်း သတင်းရရှိသည်။