မျိုးဆက်သစ်လူငယ်များအား ရာသီဥတုပြောင်းလဲမှု တိုက်ဖျက်ရေးနှင့် ဇီဝမျိုးစုံမျိုးကွဲ ထိန်းသိမ်းရေးတွင် သစ်တောများ၏ အရေးကြီးသည့် အခန်းကဏ္ဍကို နားလည်စေရန်၊ သစ်တောနှင့် သဘာဝ ပတ်ဝန်းကျင်ဆိုင်ရာ အတွေးအမြင်များကို မြှင့်တင်ရန်နှင့် AFoCO RETC ကို လေ့လာ စေပြီး၊ နိုင်ငံတကာနှင့် ပူးပေါင်းဆောင်ရွက်မှုများကို သိရှိစေရန် ရည်ရွယ်၍ ‘သစ်တောနှင့် သဘာဝ ပတ်ဝန်းကျင်ဆိုင်ရာ ပညာပေးခြင်းအစီအစဉ် (eco-school)’ကို ၂၀၂၄-၂၀၂၅ ဘဏ္ဍာနှစ်၏ တတိယ အကြိမ်အဖြစ် AFoCO RETC သင်တန်းကျောင်းတွင် ၂၀၂၄ ခုနှစ်၊ ဩဂုတ်လ ၁၄ ရက်နေ့ နံနက် ၀၉:၀၀ နာရီမှ နေ့လည် ၁၂:၃၀ နာရီအထိ ကျင်းပခဲ့ပါသည်။
အဆိုပါ Eco-school အစီအစဉ်သို့ မင်္ဂလာဒုံမြို့နယ်၊ အမှတ်(၈)၊ အခြေခံပညာ အထက်တန်း ကျောင်းမှ ကျောင်းသား(၉၀)ဦး တက်ရောက်ခဲ့ပြီး သစ်တောနှင့်ပတ်ဝန်းကျင် ထိန်းသိမ်းရေးဆိုင်ရာ အသိပညာပေး ဟောပြောခြင်း၊ ပညာပေးပြခန်း၊ လေ့ကျင့်ရေးသစ်တောနှင့် သစ်တော ပျိုးဥယျာဉ် တို့အား လေ့လာစေခြင်း၊ သရုပ်ပြ၍ စုပေါင်းသစ်ပင်စိုက်ပျိုးခြင်းများ ဆောင်ရွက်ခဲ့ ပါသည်။ ထို့အပြင် လေ့လာခဲ့သည့်အကြောင်းအရာများကို ကစားပွဲအသွင် အုပ်စုဖွဲ့၍ ယှဉ်ပြိုင်ဖြေဆို စေခြင်း များ ဆောင်ရွက်လျက် ဆုလက်ဆောင်ချီးမြှင့်ကာ တက်ရောက်သူ ကျောင်းသားတစ်ဦးချင်းစီကို လည်း အမှတ်တရလက်ဆောင်များ ပေးအပ်ခဲ့ပါသည်။
ယခုအစီအစဉ်ကို ကျင်းပနိုင်ခဲ့ခြင်းဖြင့် မျိုးဆက်သစ်လူငယ်များအနေဖြင့် သစ်တောများ၏ အကျိုးကျေးဇူး၊ ရာသီဥတု ပြောင်းလဲမှုလျော့ချရေးနှင့် ကာဗွန်ထုတ်လွှတ်မှု လျော့ချရေး လုပ်ငန်း စဉ်များတွင် မိမိတို့ကိုယ်တိုင် ပါဝင်ဆောင်ရွက်နိုင်သည့် နည်းလမ်းများ သိရှိခြင်း၊ ပတ်ဝန်းကျင် ထိန်းသိမ်းရေးအမြင်(3R စနစ်)ဖြင့် အမှိုက်များကို စနစ်တကျ စွန့်ပစ်လာတတ်စေခြင်း၊ ရရှိသော ဗဟုသုတများကို ၎င်းတို့၏ သူငယ်ချင်း၊ မိသားစုနှင့် ပတ်ဝန်းကျင်အား ပြန်လည်မျှဝေနိုင်ခြင်း တို့ကြောင့် သစ်တောနှင့် ပတ်ဝန်းကျင်ထိန်းသိမ်းရေး စိတ်ဓာတ်များ နိုးကြားနေစေခြင်း စသည့် အကျိုးကျေးဇူးများအပြင် ကျောင်းသားတစ်ဦးချင်းစီအား ကျောင်းသုံးပစ္စည်းလက်ဆောင်များ ပေးဝေနိုင်ခဲ့သည့် အကျိုးကျေးဇူးများ ရရှိခဲ့ပါသည်။