သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန
သစ်တောဦးစီးဌာန

ပြည်သူပူးပေါင်းပါဝင်မှုဖြင့် လူထုအခြေပြုစောင့်ကြပ်ကြည့်ရှု့ သတင်းပို့စနစ်-CMRS ဖြင့် သတင်းပေးပို့ချက်အရ ၂၂-၆-၂၀၂၀ ရက်နေ့တွင် စစ်ကိုင်းတိုင်းဒေသကြီး၊ မုံရွာခရိုင်၊ မုံရွာမြို့နယ်၊ သစ်တောဦးစီးဌာနမှ သစ်တောဝန်ထမ်းများ၊ မြန်မာနိုင်ငံရဲတပ်ဖွဲ့ဝင်များ၊ ရပ်ကွက်အုပ်ချုပ်ရေးအဖွဲ့ဝင်များ ပါဝင်သော ပူးပေါင်းအဖွဲ့သည် မုံရွာမြို့နယ်၊ စစ်ပင်ရပ်ကွက်၊ ပန်းပဲတန်းနယ်မြေ၊ ဘူတာသွားလမ်းနှင့် ကမ်းနားသွားလမ်းနေရာရှိ ခြံဝင်းအတွင်းသို့ သတင်းအရ သွားရောက်ဖမ်းဆီးရာ ခြံဝင်းအတွင်းရှိ မော်တော်ယာဉ်မှာ မောင်းနှင်ထွက်ပြေးသွားသဖြင့် ဖမ်းဆီးရေးအဖွဲ့မှ လိုက်လံဖမ်းဆီးရာ အလုံဘူတာအနီး လမ်းပေါ်တွင် စက်ရပ်မထားဘဲ ရပ်တန့်၍ ယာဉ်မောင်းထွက်ပြေးသွားပြီး မော်တော်ယာဉ် အား ရှာဖွေစစ်ဆေးရာ မော်တော်ယာဉ်အမှတ်မပါ DONG FENG စက်မှုဖုန်ထုတ်ဖြူ/စိမ်းကြား(၆)ဘီးယာဉ်ပေါ်မှ လုံးပတ်(၃)ပေါအောက်အင်သစ်(၄၄)လုံး(၄)တန်အား ဖမ်းဆီးရမိခဲ့ပြီး သစ်ပိုင်ရှင်အား စုံစမ်းဖော်ထုတ် အရေးယူပေးပါရန် မုံရွာမြို့၊ မြို့မရဲစခန်းတွင် အမှုဖွင့်လှစ်အရေးယူဆောင်ရွက်လျက်ရှိပါသည်။

၂၂-၆-၂၀၂၀ ရက်နေ့တွင် ရှမ်းပြည်နယ်(တောင်ပိုင်း)၊ လွိုင်လင်ခရိုင်၊ ကွန်ဟိန်းမြို့နယ်၊ သစ်တောဦးစီးဌာနမှ သစ်တောဝန်ထမ်းများအဖွဲ့သည် ကွန်ဟိန်းမြို့နယ်၊ ကွန်ဟိန်းမြို့ရှောင်လမ်း၊ ဟိုကျယ်ကျေးရွာအနီးနေရာ၌ မော်တော်ယာဉ်အမှတ် (6L/1436) ALPHARD (၄)ဘီး (ငွေရောင်) ယာဉ်ပေါ်မှ တရားမဝင်ကျွန်းတံခါးရွက်ဆိုဒ်စုံ (၄၁) ချပ် (၁)တန်အား တရားခံ(၁)ဦးနှင့်အတူ ဖမ်းဆီးရမိခဲ့ပြီး တရားခံအား ဥပဒေနှင့်အညီ ထိရောက်စွာ အရေးယူနိုင်ရေး သက်ဆိုင်ရာရဲစခန်းတွင် အမှုဖွင့်လှစ်ဆောင်ရွက်လျက် ရှိပါသည်။

၂၀-၆-၂၀၂၀ ရက်နေ့တွင် ကယားပြည်နယ်၊ လွိုင်ကော်ခရိုင်၊ လွိုင်ကော်မြို့နယ်၊ သစ်တောဦးစီးဌာနမှ သစ်တောဝန်ထမ်းများ၊ မြန်မာနိုင်ငံရဲတပ်ဖွဲ့ဝင်များပါဝင်သော ပူးပေါင်းအဖွဲ့သည် လွိုင်ကော်မြို့နယ်၊ ထေးသမရပ်ကွက်အတွင်း ညနေခင်းဈေးလမ်းမဘေးနေရာ၌ တစ်ဦးတစ်ယောက်မှ တွေ့ရှိရခြင်းမရှိဘဲ မသင်္ကာဖွယ်ရပ်တန့်ထားသော မော်တော်ယာဉ်အမှတ်(YGN SE/8176) HILUX SURF ယာဉ်အား စစ်ဆေးရှာဖွေရာ ယာဉ်ပေါ်မှ တရားမဝင်ကျွန်းခွဲသား (၃၄၃)ချောင်း (၁)တန်အား ဖမ်းဆီးရမိခဲ့ပြီး ဆက်စပ်ပတ်သက်သော တရားခံများအား စုံစမ်း ရှာဖွေဖော်ထုတ်၍ ဥပဒေနှင့်အညီ ထိရောက်စွာ အရေးယူနိုင်ရေး စီစဉ်ဆောင်ရွက်လျက်ရှိပါသည်။