ဧရာဝတီတိုင်းဒေသကြီး ၊ဟင်္သာတခရိုင်၊ဟင်္သာတမြို့နယ်တွင် သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန ဟင်္သာတခရိုင် သစ်တောဦးစီးဌာနမှ ကြီးမှူးကျင်းပပြုလုပ်သော မီးခိုး၊မြူငွေ့ လျော့ချရေးနှင့် သဘာဝဘေးအန္တရာယ်ဆိုင်ရာ ခရိုင်အဆင့် အသိပညာပေးခြင်းနှင့် ပတ်ဝန်းကျင်ထိန်းသိမ်းရေးဆိုင်ရာ အသိပညာပေးဟောပြောပွဲကို နိုဝင်ဘာ ၁၂ ရက်နေ့ နံနက် ၁၀ နာရီအချိန်က အမှတ်(၁) အခြေခံပညာအထက်တန်း ကျောင်းရှိ "ဟင်္သာ" ခန်းမတွင် ကျင်းပပြုလုပ်ခဲ့ပါသည်။ဟောပြောပွဲအခမ်းအနားတွင် ဟင်္သာတ ခရိုင် လက်ထောက်ညွှန်ကြားရေးမှူး ဦးမင်းနိုင်က မီးခိုး၊မြူငွေ့ လျော့ချရေးနှင့် သဘာဝဘေးအန္တရာယ်ဆိုင်ရာ ခရိုင်အဆင့် အသိပညာပေးဟောပြောပွဲ ကျင်းပရခြင်း ရည်ရွယ်ချက်များကိုလည်းကောင်း ၊သစ်တောသစ်ပင်များနှင့် ရာသီဥတုပြောင်းလဲမှု ဖြစ်စဥ် အခြေအနေများ၊ မျိုးဆက်သစ်လူငယ်များ လိုက်နာဆောင်ရွက်ရမည့် အခန်း ကဏ္ဍများကို ဟောပြောခဲ့ပြီးနောက်မြို့နယ်သစ်တောဦးစီးဌာနမှူး ဦးကျော်ဇင်ဦးမှ သစ်တော သစ်ပင်များ၏ အကျိုးကျေးဇူးများအကြောင်း၊သစ်တောများပြုန်းတီးမှု၏ ဆိုးကျိုးများကို ရှင်းလင်းတင်ပြခဲ့ပြီး ဇီဝမျိုးစုံမျိုးကွဲများအကြောင်း၊ပတ်ဝန်းကျင်ထိန်းသိမ်းရေး အကျိုးကျေးဇူးများ ၊သစ်တောသစ်ပင်များ စည်းကမ်းမဲ့ခုတ်ယူခြင်းကြောင့် ရရှိနိုင်သည့် ဆိုးကျိုးများ၊ ပတ်ဝန်းကျင်ရေးရာကျင့်ဝတ်များနှင့် လိုက်နာစောင့်ထိန်းရမည့် ကျင့်ဝတ်များကိုရှင်းလင်းဟောပြောခဲ့ပါသည်။အဆိုပါ အသိပညာပေး ဟောပြောပွဲသို့ ခရိုင်နှင့်မြို့နယ်သစ်တော ဦးစီးဌာနမှတာဝန်ရှိသူများ ဝန်ထမ်းများ ၊မြို့နယ်ပညာရေးဌာနမှတာဝန်ရှိသူများ အမှတ် ၁ အခြေခံပညာအထက်တန်းကျောင်း ကျောင်းအုပ်ဆရာမကြီးနှင့် ဆရာ၊ ဆရာမများ၊ကျောင်းသား၊ ကျောင်းသူများ၊ စုစုပေါင်း(၁၁၅)ဦးခန့် တက်ရောက်ခဲ့ပါကြောင်း သတင်းရရှိပါသည်။

သစ်တောဦးစီးဌာနနှင့် အာရှသစ်တောဆိုင်ရာကဏ္ဍ ပူးပေါင်းဆောင်ရွက်ရေးအဖွဲ့ (Asian Forest Cooperation Organization – AFoCO) တို့ ပူးပေါင်း၍ “ပဲခူးတိုင်းဒေသကြီးအတွင်း တည်ထောင်ထားရှိသည့် ကျွန်းစိုက်ခင်းများတွင် ကျရောက်တတ်သည့် ဖျက်ပိုးနှင့် ရောဂါများအား ဘက်ပေါင်းစုံကာကွယ်နှိမ်နင်းခြင်း နည်းလမ်းများဖြင့် စီမံအုပ်ချုပ်ခြင်း စီမံကိန်း (FD-AFoCO IPDM Project)”အား ၂၀၂၀ ပြည့်နှစ်၊ အောက်တိုဘာလ မှ ၂၀၂၅ ခုနှစ်၊ စက်တင်ဘာလအထိ (၅)နှစ်အကောင်အထည်ဖော်ဆောင်ရွက်လျက်ရှိပါသည်။အဆိုပါစီမံကိန်းအတွက် အရည်အချင်းပြည့်မီသည့် Plant Disease Technician (၁) ဦး လစ်လပ်လျက်ရှိသဖြင့် သတ်မှတ်အရည်အချင်းနှင့် ပြည့်မီသူများလျှောက်ထားနိုင်ပါသည် -

ပြည်ထောင်စုသမ္မတမြန်မာနိုင်ငံတော်အစိုးရ၊သယံဇာတနှင့်သဘာဝပတ်ဝန်းကျင် ထိန်းသိမ်း ရေးဝန်ကြီးဌာနသည် ၂၀၁၈ခုနှစ်တွင် ပြဋ္ဌာန်းထားသည့် သစ်တောဥပဒေပုဒ်မ၆၊ ပုဒ်မခွဲ(င)အရ အပ်နှင်းထားသော လုပ်ပိုင်ခွင့်များကိုကျင့်သုံးလျက် စစ်ကိုင်းတိုင်းဒေသကြီး၊ ကသာခရိုင်၊ကသာမြို့နယ်အတွင်း ကျရောက်နေသည့်ဧရိယာအကျယ်အဝန်း (၁၄,၅၃၄)ဧက ရှိသောနယ်မြေကို“မံလွဲယံကြိုးပြင်ကာကွယ်တော”အဖြစ် အမိန့်ကြော်ငြာစာအမှတ် (၇၉/၂၀၂၄) အရ ၁၃၈၆ခုနှစ်၊ တော်သလင်းလဆန်း ၄၀ရက်(၂၀၂၄ခုနှစ်၊ စက်တင်ဘာလ ၆ ရက်) မှစ၍ သတ်မှတ်ကြောင်း ကြေညာလိုက်သည်။သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနသည် မြစ်၊ ချောင်း၊ အင်း၊ အိုင် စသည့် ရေအရင်းအမြစ်နှင့် ရေဝေရေလဲဒေသများ ထိန်းသိမ်းရန်၊ ဂေဟစနစ် တည်ငြိမ်မှုရှိစေရန်၊ ဒေသခံပြည်သူများ၏ အခြေခံလိုအပ်ချက် ဖြစ်သော သစ်၊ ထင်း၊ ဝါး စသည့် သစ်တောထွက် ပစ္စည်းများ ဖြည့်ဆည်းပေးနိုင်ရန်၊ ဇီဝမျိုးစုံမျိုးကွဲများ ထိန်းသိမ်းနိုင်ရန်နှင့် ရာသီဥတုသာယာမျှတစေပြီး စိုက်ပျိုးရေးလုပ်ငန်းများကို အထောက်အကူပြုစေရန် ရည်ရွယ်၍ ကြိုးဝိုင်း/ကြိုးပြင် ကာကွယ်တောများကို ဖွဲ့စည်းသတ်မှတ်ခြင်း ဖြစ်ပါသည်။မံလွဲယံကြိုးပြင်ကာကွယ်တော သတ်မှတ်ခြင်းအားဖြင့် အဆိုပါဧရိယာအတွင်း ပေါက် ရောက်လျက်ရှိသောအဖိုးတန်သစ်မျိုးဖြစ်သည့် ကျွန်း၊ ပျဉ်းကတိုး၊ ပိတောက်၊ ထောက်ကြံ့နှင့် အခြားဒေသမျိုးရင်း သစ်မျိုးများဖြစ်သော အင်၊ ကညင်၊ ယမနေ၊ သတီ၊ သစ်အယ်၊ ဘင်္ဂ၊ ကြို့ စသည့်သစ်မျိုးများအား ထိန်းသိမ်းနိုင်မည်ဖြစ်ခြင်း၊ ချေ၊ တောဝက်၊ တောကြောင်၊ တောကြက် စသည့်တိရစ္ဆာန်များ၊ ဇီဝမျိုးစုံမျိုးကွဲများနေထိုင်ကျက်စားရာဒေသများ၊ နေရင်းဒေသများ ထိန်းသိမ်းနိုင်မည်ဖြစ်ခြင်း၊ မြန်မာနိုင်ငံ၏ အဓိကမြစ်ကြီးဖြစ်သည့် ဧရာဝတီမြစ်၏ ရေဝေရေလဲ ဒေသအား ထိန်းသိမ်းနိုင်မည်ဖြစ်ခြင်း၊ သစ်နှင့် သစ်မဟုတ်သော သစ်တောထွက်ပစ္စည်းများ ပိုမိုတိုးပွါးလာစေခြင်း၊ နှုန်းအနည်အနှစ်ပို့ချမှုများ၊ ရေတိုက်စားမှုများမှ ကာကွယ်ပေးနိုင်ခြင်း၊ သစ်တောဖုံးလွှမ်းမှုတိုးလာပြီး ရာသီဥတုပိုမိုကောင်းမွန်မျှတလာနိုင်ခြင်း၊ ဂေဟစနစ်ပိုမိုတည်ငြိမ် လာစေခြင်း စသည့်အကျိုးကျေးဇူးများ ရရှိနိုင်မည်ဖြစ်ပါသည်။