သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ သစ်တောဦးစီး ဌာန၊ မြန်မာ့သစ်လုပ်ငန်း၊ ဂေဟစနစ်ထိန်းသိမ်းရေးနှင့် ပြည်သူအစုအဖွဲ့ ဖွံ့ဖြိုးရေးအသင်း (ECCDI) တို့မှ ကြီးမှူးကျင်းပသည့် ၂၀၁၇ ခုနှစ်၊ မိုးရာသီသစ်ပင်စိုက်ပွဲတော်ကို (၂၅-၆-၂၀၁၇) ရက်နေ့ နံနက် (၈:၃၀) အချိန်တွင် ရေတာရှည် မြို့နယ်၊ ကျောက်မဆင်ကြိုးဝိုင်း၊ အကွက်အမှတ် (၂၀) တွင် မြန်မာ့ရွေးချယ်ခြင်းစနစ်ပြုပြင်ခြင်းဆိုင်ရာ သုတေသန စမ်းသပ်ကွက်အတွင်း၌ ကျင်းပခဲ့သည်။

၁၀-၅-၂၀၁၇ ရက်နေ့တွင် ပြင်ဦးလွင်ခရိုင်၊ သပိတ်ကျင်းမြို့နယ်၊ အုန်းတကူးကျေးရွာ အနောက် မြောက်ဘက် (၁) မိုင်ခွဲခန့်အကွာတွင် တောဆင်ရိုင်း(၁)ကောင် ဒဏ်ရာများဖြင့်တွေ့ရှိရကြောင်း သတင်းအရ သပိတ်ကျင်းမြို့နယ်၊ သစ်တောဦးစီးဌာန၊ ရွှေဥဒေါင်းတောရိုင်း တိရစ္ဆာန်ဘေးမဲ့တော၊ မြန်မာ့သစ်လုပ်ငန်း၊ သတ္တုဗေဒဆိုင်ရာသုတေသနနှင့် နည်းပညာဖွံ့ဖြိုးရေးတပ်၊ မြန်မာနိုင်ငံရဲတပ်ဖွဲတို့ ပါဝင်သောပူးပေါင်းအဖွဲ့မှ ကွင်းဆင်းစစ်ဆေးရှာဖွေကာ ၁၂-၅-၂၀၁၇ ရက်နေ့(၁၀:၁၀)နာရီအချိန်တွင် မြန်မာ့သစ်လုပ်ငန်းမှ ကွန်ဂျီဆင် (၃)ကောင်ဖြင့် ဆင်သွားရာ လမ်းတစ်လျောက် လိုက်လံစောင့်ကြပ် ထိန်းချုပ်ခေါ်ဆောင်ပြီး ၎င်းတောဆင်အား မေ့ဆေး အသုံးပြု၍ဆေးကုသပေးခြင်း ဆောင်ရွက်ခဲ့ရာ ညာဘက်တင်ပါးတွင် ဒဏ်ရာ(၂)ချက်၊ ညာလက်တွင် ဒဏ်ရာ (၁) ချက် တို့ကို ဦးစွာဆေးကြောသန့်စင် ဆေးထည့်ခြင်း၊ ညာဘက်တင်ပါးရှိ (၆) လက်မခန့် သစ်သားချောင်းဖြင့်တွဲလျက် သံအဆိပ်လူးမြှား ဒဏ်ရာကိုခွဲစိတ်ကုသခြင်း၊ ဖြေဆေး ထိုးခြင်းဆောင်ရွက်ခဲ့ရာ ဆင်မှာတောအတွင်းသို့ ပြန်လည်လမ်းလျှောက်ထွက်ခွာနိုင်ခဲ့ပြီး ယခုကဲ့သို့ ဒဏ်ရာရရှိအောင် ပြုလုပ်ခဲ့သည့် တရားခံများအား ဖော်ထုတ်ဖမ်းဆီးနိုင်ရေး သက်ဆိုင်ရာဌာနများဖြင့် ပူးပေါင်းကာ ဆက်လက် ဆောင်ရွက် လျက်ရှိပါသည်။

သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ သစ်တောဦးစီးဌာန နှင့် အာရှ-ပစိဖိတ်ဒေသဆိုင်ရာ ဒေသခံပြည်သူအစုအဖွဲ့ပိုင်သစ်တော လေ့ကျင့်ပညာပေးရေး ဗဟိုဌာန (RECOFTC- Centre for the People and Forest) ၊ မြန်မာ့ပတ်ဝန်းကျင် ထူထောင်ထိန်းသိမ်းရေးကွန်ယက် (MERN-Myanmar Environmental Restoration Network) နှင့် WWF (World Wildlife Fund) အဖွဲ့တို့ ပူးပေါင်း၍ ယနေ့ နံနက်(၉:၃၀) အချိန်တွင် နေပြည်တော်၊ သင်္ဂဟဟိုတယ်တွင် ကျင်းပသည့် “မဲခေါင်သစ်တောများအတွက် ဒေသခံတို့အသံ” စီမံကိန်းဆိုင်ရာ ကနဦးအလုပ်ရုံ ဆွေးနွေးပွဲ ဖွင့်ပွဲ အခမ်းအနားတွင် ပြည်ထောင်စုဝန်ကြီး ဦးအုန်းဝင်းတက်ရောက်၍ အဖွင့်အမှာစကားပြောကြားပါသည်။