သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန
သစ်တောဦးစီးဌာန

ပြည်ထောင်စုသမ္မတ မြန်မာနိုင်ငံတော်အစိုးရ၊ သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာနသည် ၂၀၁၈ခုနှစ်တွင် ပြဋ္ဌာန်းထားသည့် သစ်တောဥပဒေပုဒ်မ၆၊ ပုဒ်မခွဲ (င)အရ အပ်နှင်းထားသော လုပ်ပိုင်ခွင့်များကိုကျင့်သုံးလျက် ပဲခူးတိုင်းဒေသကြီး၊ ပဲခူးခရိုင်၊ ကဝမြို့နယ်အတွင်း ကျရောက်နေသည့် ဧရိယာအကျယ်အဝန်း ၂၈,၃၉၂ ဧကရှိသော နယ်မြေကို “အောင်နိမိတ်ဒီရေတောကြိုးပြင်ကာကွယ်တော”အဖြစ် အမိန့်ကြော်ငြာစာအမှတ် (၄၂/၂၀၂၅)အရ ၁၃၈၇ ခုနှစ်၊ ကဆုန်လဆန်း(၄)ရက်(၂၀၂၅ ခုနှစ်၊ ဧပြီလ ၃၀ ရက်)မှစ၍ သတ်မှတ်ကြောင်း ကြေညာလိုက်သည်။သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာနသည် ဒီရေတောဂေဟစနစ် ရေရှည်တည်တံ့စေရန်၊ ဇီဝမျိုးစုံမျိုးကွဲများပေါကြွယ်ဝစေရန်၊ လှိုင်းဒဏ်/ လေမုန်တိုင်းဒဏ်ခံစား ရမှုများအား သဘာဝအစိမ်းရောင်တံတိုင်းကြီးများသဖွယ် ကာကွယ်ရန်၊ ကမ်းရိုးတန်းဒေသ ရေရှည်တည်တံ့စေရေးကို အထောက်အကူပြုနိုင်ရန်၊ ဒေသခံပြည်သူများအတွက် ငါး၊ ပုစွန်၊ ကဏန်း စသော ရေသယံဇာတများ စဉ်ဆက်မပြတ် ထုတ်ယူသုံးစွဲနိုင်ရန်၊ ကုန်းတွင်းပိုင်းသို့ ဆားငံရေ ဝင်ရောက်မှုများမှ တားဆီးကာကွယ်နိုင်ရန်နှင့် ဒီရေတောဂေဟစနစ်စီမံအုပ်ချုပ်မှု ပိုမို ကောင်းမွန်လာစေရန်ရည်ရွယ်၍ ဒီရေတောကြိုးဝိုင်း/ကြိုးပြင်ကာကွယ်တောများ ဖွဲ့စည်းသတ် မှတ်ခြင်းဖြစ်ပါသည်။အောင်နိမိတ်ဒီရေတောကြိုးပြင်ကာကွယ်တောသတ်မှတ်ခြင်းဖြင့် အဆိုပါဧရိယာအတွင်း ပေါက်ရောက်လျက်ရှိသော ဒီရေတောသစ်မျိုးများဖြစ်သည့် သမဲ့၊ လမု၊ သရော၊ ကန့်ပလာ၊ သခွတ်၊ ရေခရားသစ်မျိုးများအား ထိန်းသိမ်းနိုင်မည်ဖြစ်ခြင်း၊ ငါးမျိုးစုံ၊ ပုစွန်မျိုးစုံ၊ ခရုမျိုးစုံ၊ ကဏန်းမျိုးစုံတို့၏ရှင်သန်ပေါက်ဖွားရာဂေဟစနစ်ပိုမိုကောင်းမွန်လာစေခြင်း၊ ဘုတ်၊ ဒင်ကြီးငှက်၊ ဗျိုင်း၊ ငှက်ကြား၊ ခရုစုပ်ငှက်၊ ဘီလုံးငှက်၊ စင်ရော်ငှက်စသည့် ငှက်မျိုးများ၏ နေရင်းဒေသအား ထိန်းသိမ်းနိုင်မည်ဖြစ်ခြင်း၊ဒေသခံပြည်သူများ၏လူမှုစီးပွါးဖွံ့ဖြိုးတိုးတက်မှုအထောက်အကူပြုနိုင် ခြင်း၊ ဒီရေတောများသည်အဏ္ဏဝါဂေဟစနစ်ကို တည်ငြိမ်မှုအတွက် အရေးပါသည့် ဂေဟစနစ် တစ်ခုဖြစ်ခြင်းနှင့် သဘာဝဘေးအန္တရာယ်မှ ကာကွယ်ပေးနိုင်ခြင်းစသည့် အကျိုးကျေးဇူးများရရှိ နိုင်မည်ဖြစ်ပါသည်။

နိုင်ငံအဆင့် ပင်လယ်ကမ်းရိုးတန်းသယံဇာတ စီမံအုပ်ချုပ်လုပ်ကိုင်မှု ဗဟို​ကော်မတီအတွင်း​ရေးမှူးနှင့် တိုင်း​ဒေသကြီး/ပြည်နယ်အဆင့်​ကော်မတီအတွင်း​ရေးမှူးများ၏ လုပ်ငန်းညှိနှိုင်းအစည်းအ​ဝေးကို ( ၆-၅-၂၀၂၅ ) ရက် ၀၉း၃၀ နာရီတွင် သစ်​တောဦးစီးဌာန၊ ညွှန်ကြား​ရေးမှူးချုပ်ရုံး အစည်းအ​ဝေးခန်းမ၌ကျင်းပရာ သယံဇာတနှင့်သဘာဝပတ်ဝန်းကျင်ထိန်းသိမ်းဝန်ကြီးဌာန၊ အမြဲတမ်းအတွင်းဝန်၊ ဗဟို​ကော်မတီအတွင်း​ရေးမှူး ဦးလှ​မောင်သိန်းတက်​ရောက် အမှာစကား​ပြောကြားပြီး အစည်းအ​ဝေးကို ဗဟို​ကော်မတီ တွဲဖက်အတွင်း​ရေးမှူး(၂)၊ သစ်​တောဦးစီးဌာန၊ ဒုတိယညွှန်ကြား​ရေးမှူးချုပ်များ၊ ငါးလုပ်ငန်းဌာနမှ ဒုတိယညွှန်ကြားရေးမှူးချုပ်၊ ဆက်စပ်ဌာနများမှ ညွှန်ကြားရေးမှူးများ၊ ညွှန်ကြား​ရေးမှူးချုပ်ရုံးမှ ဌာနအလိုက် ညွှန်ကြား​ရေးမှူးများတက်​ရောက်၍ သက်ဆိုင်ရာ တိုင်း​ဒေသကြီး/ပြည်နယ်အဆင့်​ကော်မတီအတွင်း​ရေးမှူးများက Online စနစ်ဖြင့် တက်​ရောက်ကြပါသည်။ ဦးစွာ ​ဗဟိုကော်မတီနှင့် လုပ်ငန်း​ကော်မတီအတွင်း​ရေးမှူးက လုပ်ငန်း​ကော်မတီ(ဆဋ္ဌမအကြိမ်)နဲ့ ဗဟို​ကော်မတီ(သတ္တမအကြိမ်)အစည်းအ​ဝေးများ ​အောင်မြင်စွာကျင်းပနိုင်​ရေး ညှိနှိုင်း​ဆွေး​နွေးလို​ကြောင်း၊ ဗဟိုကော်မတီ အစည်းအ​ဝေးများကျင်းပခဲ့ရာ (၆) ကြိမ်​မြောက်ထိပြီးစီးခဲ့ပြီး ​ဆောင်ရွက်ရမည့်ဆုံးဖြတ်ချက်များ၊ လုပ်ငန်းကဏ္ဍများလည်းစုံလင်လာ၍ ဆုံးဖြတ်ချက်များအ​ပေါ် အချိန်နှင့်တစ်​ပြေးညီ ​ဆောင်ရွက်၍တင်ပြရန်လို​ကြောင်း၊ ငါးလုပ်ငန်းဦးစီးဌာန၊ ပတ်ဝန်းကျင်ထိန်းသိမ်း​ရေးဦးစီးဌာနနှင့် သစ်​တောဦးစီးဌာနတို့အ​နေဖြင့် အ​ကောင်အထည်​ဖော်ပြီးလုပ်ငန်းများ၏တိုးတက်မှုများတင်ပြနိုင်​ရေး၊ ဆက်လက် အ​ကောင်အထည်​​ဖော်မည့် လုပ်ငန်းအစီအမံများတင်ပြရမည်ဖြစ်​ကြောင်း၊ သက်ဆိုင်ရာတိုင်း​ဒေသကြီး/ပြည်နယ်အဆင့် အတွင်း​ရေးမှူးများကလည်း ဆုံဖြတ်ချက်များအ​ပေါ် ​ဆောင်ရွက်ပြီးစီးမှု၊ ​ရေရှည်​ရေတိုနှင့် ပူးပေါင်းအ​ကောင်အထည်​ဖော်ရမည့် စီမံချက်များတင်ပြနိုင်​ရေးနှင့် အပြာ​ရောင်စီးပွား​ရေးဖွံဖြိုးမှုတွက် ကြိုတင်ပြင်ဆင်​ဆောင်ရွက်ရမည်ဖြစ်ကြောင်းနှင့် အလားတူ လုပ်ငန်း​ကော်မတီအစည်းအ​ဝေးဆုံးဖြတ်ချက်များအ​ပေါ် အ​ကောင်အထည်​ဖော်မှုများကို တင်ပြရန်၊ လုပ်ငန်း​ကော်မတီ (ဆဋ္ဌမအကြိမ်) အစည်းအ​ဝေးတွင်​ဆွေး​နွေးရန် အဖွင့်အမှာစကား​ပြောကြားပြီးနောက် တက်ရောက်လာသူများမှ လုပ်ငန်း​ဆောင်ရွက်တိုးတက်မှုများကိုတင်ပြခဲ့ပြီးနောက် ဆက်လက်ဆောင်ရွက်ရမည့် အချက်များကိုဝိုင်းဝန်းဆွေးနွေးသတ်မှတ်ခဲ့ပါကြောင်းသတင်းရရှိပါသည်။

သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ သစ်တောဦးစီးဌာနအနေဖြင့် မြန်မာ့ကျွန်း သစ်မူရင်းဒေသဖြစ်သော ပဲခူးရိုးမအတွင်း ၂၀၁၆-၁၇ ဘဏ္ဍာနှစ်မှစ၍ တရားဝင်သစ်ထုတ်လုပ်ခြင်းလုပ်ငန်းအား (၁၀)နှစ်ရပ်နားထားပြီး သစ်တောပြုစုထိန်းသိမ်းခြင်းလုပ်ငန်းများအား အရှိန်အဟုန်မြှင့်ဆောင်ရွက်နေလျှက်ရှိသည့် အပြင် တရားမဝင်သစ်ခိုးထုတ်ခြင်း၊ တရားမဝင်တောရိုင်းတိရစ္ဆာန်များ သတ်ဖြတ်ခြင်းနှင့် ကျူးကျော်အခြေချနေထိုင် ခြင်းများအား ပြည်သူပူးပေါင်းပါဝင်မှုဖြင့် စီမံချက်ချအကောင်အထည်ဖော် ဆောင်ရွက်နေလျှက်ရှိပါသည်။ ပဲခူးရိုးမ စိမ်းလန်းစိုပြည်ရေး ဧရိယာအတွင်းမှ (၂၁-၄-၂၀၂၅)ရက်နေ့မှ (၂၇-၄-၂၀၂၅) ရက်နေ့ထိ တစ်ပတ်တာကာလအတွင်း တရားမဝင်ကျွန်း၊ သစ်မာ၊ အခြား စုစုပေါင်း (၂၄.၂၄၃၀)တန်ဖမ်းဆီးရမိခဲ့ပါသည်။