၂၁-၁၁-၂၀၁၉ ရက်နေ့တွင် စစ်ကိုင်းတိုင်းဒေသကြီး၊ မော်လိုက်ခရိုင်၊ ဖောင်းပြင်မြို့နယ်၊ သစ်တောဦးစီးဌာနမှ ဦးစီးအရာရှိ ဦးဆောင်သော သစ်တောဝန်ထမ်းများအဖွဲ့သည် ဖောင်းပြင်မြို့နယ်၊ နန်းပါဟုတ်ကျေးရွာ၏ အနောက်မြောက်ဘက် (၅)မိုင်ခန့်အကွာနေရာ၌ တရားမဝင်အင်သစ် (၁၂)လုံး (၁၀.၁၁၇၂)တန်အား ဖမ်းဆီးရမိခဲ့ပြီး ဆက်စပ်ပတ်သက်သော တရားခံများအား စုံစမ်း ရှာဖွေဖော်ထုတ်၍ ဥပဒေနှင့်အညီ ထိရောက်စွာ အရေးယူနိုင်ရေး စီစဉ်ဆောင်ရွက်လျက်ရှိပါသည်။

၁၉၁၉ ခုနှစ်တွင်တည်ထောင်စိုက်ပျိုးခဲ့သည့် ကျွန်းစိုက်ခင်းသက်တမ်းနှစ် (၁၀၀)ပြည့် အခမ်း အနားကို ၂၄-၁၁-၂၀၁၉ရက်နေ့၊ နံနက်(၀၉:၀၀) နာရီတွင် ပဲခူးတိုင်းဒေသကြီး၊ ပြည်ခရိုင်၊ ပေါက်ခေါင်းမြို့နယ်၊ တောင်နဝင်းကြိုးဝိုင်း၊ အကွက်အမှတ်(၂၀)အတွင်း ကျင်းပရာ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ ပြည်ထောင်စုဝန်ကြီး ဦးအုန်းဝင်း တက်ရောက်၍ အဖွင့်အမှာစကားပြောကြားပါသည်။ အဖွင့်အမှာစကားပြောကြားရာတွင် ကျွန်းစိုက်ခင်းတစ်ခင်း၏ နှစ်(၁၀၀)ပြည့် အခမ်းအနား တွင် အမှာစကားပြောကြားရသည့်အတွက် ဂုဏ်ယူဝမ်းမြောက်ပါကြောင်း၊ မြန်မာနိုင်ငံတွင်သိပ္ပံ နည်းကျ သစ်တောစီမံအုပ်ချုပ်မှုကို ၁၈၅၆ ခုနှစ်မှစတင်ဆောင်ရွက်ခဲ့ပြီး သစ်တောဌာနပေါ်ပေါက် ခဲ့ကြောင်း၊ ၁၈၇၀ ခုနှစ်မှစတင်၍ ပထမဆုံးသစ်တောကြိုးဝိုင်း(၁၇)ခုကိုဖွဲ့စည်းနိုင်ရန် ဆောင်ရွက် ခဲ့ပြီး တောင်နဝင်းကြိုးဝိုင်းသည် အမိန့်ကြော်ငြာစာအမှတ်၊ ၃၅၁/၆-၈-၁၈၉၆ ဖြင့် (၃၅၀၄၃)ဧကကို ဖွဲ့စည်းခဲ့ပါသည်။ ရှေးယခင်ကပင် ထာဝစဉ်တည်တံ့စေသည့်သစ်တောစီမံအုပ်ချုပ်မှု၏ အနှစ်သာရ ဖြစ်သော မြန်မာ့ရွေးချယ်ခြင်းစနစ် (MyanmaSlection System-MSS)ကို ကျင့်သုံးပြီး ကန့်သတ် လုံးပတ်ပြည့်မီသော ကျွန်းပင်များကိုသာ သင်းသတ်ခုတ်လှဲထုတ်ယူခဲ့ပြီး မျိုးဆက်မှု လိုအပ်သည့် နေရာများတွင် ကျွန်းစိုက်ခင်းငယ်များကို ကွက်လပ်ဖြည့်စိုက်ပျိုး တည်ထောင်နိုင်ခဲ့သဖြင့် နှစ်(၁၀၀) ပြည့်စိုက်ခင်းကို မျက်ဝါးထင်ထင်တွေ့မြင်နေရခြင်းဖြစ်ပါသည်။ မှတ်တမ်းများအရကရင်တောင်ယာ သမားကြီး ဦးပန်းဟီမှ သစ်တောပညာရှင် ဒေါက်တာဘရန်းဒစ်အား တောင်ယာနည်းစနစ်ဖြင့် စိုက်ပျိုးထားသည့် ကျွန်းစိုက်ခင်းကို ၁၈၅၆ခုနှစ်တွင် ခရစ္စမတ်လက်ဆောင်အဖြစ် ပေးခဲ့သည့် နောက်ပိုင်း စိုက်ခင်းသစ်တောပညာ (Plantation Forestry)ဖွံ့ဖြိုးခဲ့ပါကြောင်း၊ မြန်မာနိုင်ငံ၏ ပထမဦးဆုံး ကျွန်းစိုက်ခင်းကို ချင်းပြည်နယ်၊ ပလက်ဝနယ်မှာ စိုက်ပျိုးခဲ့သည်ဟု သိရသော်လည်း အချက်အလက် မရရှိနိုင်ခြင်းကြောင့် ၁၈၅၆ ခုနှစ် နောက်ပိုင်းပဲခူးရိုးမတွင် စိုက်ပျိုးခဲ့သည့့် စိုက်ခင်း များသည်သာလျှင် ကျွန်းစိုက်ခင်းများ၏ အစဖြစ်ကြောင်း၊ ပဲခူးရိုးမ၏ အစောဆုံး ကျွန်းစိုက်ခင်း တစ်ခုကိုဒေါက်တာဘရန်းဒစ်က ၁၈၅၇ခုနှစ်တွင် တည်ထောင်ခဲ့ပြီး၊ ပြည်ခရိုင်၊ ပြည်မြို့နယ်တွင် (၂၄)ဧက ရှိပါကြောင်း၊ ယခုကဲ့သို့ သမိုင်းဝင် အခမ်းအနားတစ်ရပ်ကို ကျွန်းစိုက်ခင်း တစ်ခုတွင် ကျင်းပနိုင်ခြင်းသည်၁၉ ရာစုမှ ၂၁ ရာစုအတွင်း ပဲခူးရိုးမနှင့်ပြည်ခရိုင်မှာ တာဝန်ထမ်းဆောင်ခဲ့သူ များနှင့် ထမ်းဆောင်ဆဲသစ်တောအရာထမ်း/အမှုထမ်းများအတွက် ဂုဏ်ယူစရာဖြစ်ပါကြောင်း။

၂၀-၁၁-၂၀၁၉ ရက်နေ့တွင် ရှမ်းပြည်နယ်(မြောက်ပိုင်း)၊ မူဆယ်ခရိုင်၊ မူဆယ်မြို့နယ်၊ သစ်တောဦးစီးဌာနမှ ဦးစီးအရာရှိ ဦးဆောင်သော သစ်တောဝန်ထမ်းများ၊ မြန်မာနိုင်ငံရဲတပ်ဖွဲ့ဝင်များပါဝင်သော ပူးပေါင်းအဖွဲ့သည် မူဆယ်မြို့နယ်၊ မော်တောင်းကျေးရွာအနီးတွင် မော်တော်ယာဉ်အမှတ် (YGN 3P/3744) NISSAN (ခရမ်း/အဖြူရောင်) ယာဉ်ပေါ်မှ တရားမဝင်တမလန်းဓါးရွေ(၃၉)တုံး (၄.၀၁၀၆)တန်အား တရားခံ(၁)ဦးနှင့်အတူ ဖမ်းဆီးရမိခဲ့ပြီး တရားခံအား ဥပဒေနှင့်အညီ ထိရောက်စွာ အရေးယူနိုင်ရေး သက်ဆိုင်ရာရဲစခန်းတွင် အမှုဖွင့်လှစ်ဆောင်ရွက်လျက် ရှိပါသည်။