သစ်တောဦးစီးဌာန၊ ညွှန်ကြားရေးမှူးချုပ် ဒေါက်တာသောင်းနိုင်ဦးသည် သစ်တောဦးစီးဌာနနှင့် တရုတ်သိပ္ပံအကယ်ဒမီ( CAS)ကူမင်းရုံးခွဲမှ Director General ဖြစ်သူ Prof. Jie Zhou ဦးဆောင်သော ကိုယ်စားလှယ်အဖွဲ့အား ( ၂၅-၇-၂၀၂၄) ရက်နေ့နံနက်ပိုင်းတွင် သစ်တောဦးစီးရုံးချုပ်၊ အင်ကြင်းခန်းမတွင် လက်ခံတွေ့ဆုံပြီး သစ်တောဦးစီးဌာနနှင့် တရုတ်သိပ္ပံအကယ်ဒမီ(CAS) စစ်ဆောင်ပါးနားအပူပိုင်းရုက္ခဗေဒဥယျာဉ်(XTBG)တို့အကြား နားလည်မှုစာချွန်လွှာ လက်မှတ်ရေးထိုးပူးပေါင်းဆောင်ရွက်လျက်ရှိသောလုပ်ငန်းများနှင့်ပတ်သက်၍ ဆောင်ရွက်နေမှုအခြေအနေနှင့် ပိုမိုပူးပေါင်းဆောင်ရွက်သွားနိုင်ရေး ရင်းနှီးပွင့်လင်းစွာ ဆွေးနွေးခဲ့ကြပါသည်။သစ်တောဦးစီးဌာနနှင့် တရုတ်သိပ္ပံအကယ်ဒမီ (CAS) စစ်ဆောင်ပါးနားအပူပိုင်း ရုက္ခဗေဒဥယျာဉ်( XTBG)တို့သည် “မြန်မာနိုင်ငံတွင်ဇီဝမျိုးစုံမျိုးကွဲထိန်းသိမ်းခြင်းနှင့် သုတေသနလုပ်ငန်းများ ပူးပေါင်းဆောင်ရွက်ခြင်းစီမံကိန်း”ကို ၂၀၂၄ ခုနှစ် ဧပြီလမှ ၂၀၂၉ ခုနှစ် ဧပြီလအထိ (၅)နှစ်သက်တမ်းရှိသော စာချွန်လွှာလက်မှတ်ရေးထိုးဆောင်ရွက်လျက်ရှိကြောင်းနှင့် တွေ့ဆုံပွဲသို့ သစ်တောဦးစီးဌာနမှ ညွှန်ကြားရေးမှူးချုပ်ဒေါက်တာသောင်းနိုင်ဦး၊ ဒုတိယညွှန်ကြားရေးမှူးချုပ်များ၊ညွှန်ကြားရေးမှူးများတက်ရောက်ခဲ့ကြကြောင်းသိရှိရပါသည်။

သစ်တောဦးစီးဌာန၊ ပြင်ဦးလွင်မြို့၊ မြန်မာနိုင်ငံသစ်တောကျောင်းရှိ အခြေခံသစ်တော ပညာသင်တန်းအမှတ်စဉ်(၁၁၇)နှင့် (၁၁၈)များမှ သင်တန်းသားများ၏ ကျွမ်းကျင်မှုနှင့်ဝါသနာများအလိုက် ဘောလုံး၊ ဘော်လီဘော၊ ပိုက်ကျော်ခြင်း၊ စားပွဲတင်တင်းနစ် အစရှိသည့် အားကစားအသင်းများ ဖွဲ့စည်းဆောင်ရွက်လျက်ရှိပြီး အဆိုပါဖွဲ့စည်းထားရှိသည့် အားကစားအသင်းများအလိုက် ကျွမ်းကျင်အားကစားနည်းပြဆရာများခေါ်ယူ၍ (၁၅-၇-၂၀၂၄)ရက်နေ့မှ စတင်လေ့ကျင့်သင်ကြားပေးလျက်ရှိကြောင်းသိရှိရပါသည်။

ပဲခူးမြို့နယ်သစ်တောဦးစီးဌာန၏ "မိုးရာသီသစ်ပင်စိုက်ပျိုး၊ ပြုစု၊ ထိမ်းသိမ်းခြင်း အသိပညာပေးဟောပြောပွဲ"အား(၂၃-၇-၂၀၂၄)ရက်နေ့ (၁၀း၀၀)နာရီတွင် ပဲခူးတက္ကသိုလ်၏ Community Center ခန်းမအတွင်း ကျင်းပပြုလုပ်ခဲ့ရာ ပဲခူးတက္ကသိုလ်မှ ဒုတိယပါမောက္ခချုပ် ဒေါက်တာစန်းယုမော် ဦးဆောင်သည့် ဒုတိယပါမောက္ခချူပ်(၂)အပါအဝင်၊ ပါမောက္ခဌာနမှူးများ၊ ပါမောက္ခများ၊ ဆရာဆရာမများ၊ ကျောင်းသားကျောင်းသူများ အင်အား (၁၅၀)ဦးမှတက်ရောက်ပါသည်။ ဟောပြောပွဲအခမ်းအနားတွင် ဒုတိယ ပါမောက္ခချူပ်ဒေါက်တာ စန်းယုမော်မှအဖွင့်အမှာစကားပြောကြားပြီးပဲခူး မြို့နယ်သစ်တောဦးစီးဌာန ဦးစီအရာရှိ ဦးတင်ထွန်းမှ သဘာဝဘေးအန္တရယ်လျော့ချရေးနှင့် ရာသီဥတုပြောင်းလဲမှု ဆိုင်ရာနှင့်သစ်ပင်စိုက်ပျိုး၊ ပြုစု၊ ထိန်းသိမ်းခြင်းဆိုင်ရာကိစ္စရပ်များအားအသိပညာပေးဟော ပြောခဲ့ပြီးသဘာဝပတ်ဝန်းကျင်ထိန်း သိမ်းရေးဆိုင်ရာသဲကန္တာရတိုက်ဖျက်ရေး Video Clip အားပြသပါသည်။ ဆက်လက်၍ပဲခူးတက္ကသိုလ်စန္ဒကူးအဆောင်ရှေ့ရှိမြေကွက်လပ်တွင် ပဲခူးတက္ကသိုလ်၏ ၂၀၂၄ခုနှစ်သစ်ပင်စိုက်ပျိုးပွဲတော်အား ကျင်းပပြုလုပ်ခဲ့ရာ ဒုတိယပါမောက္ခချူပ်ဦးဆောင်သည့်(၁၅၀)ဦးမှ တက္ကသိုလ်ဝန်းကျင်စိမ်းလန်းစိုပြေ သာယာလှပပြီးအရိပ် ရအပွင့်ပွင့်သည့်အမြင့်(၃)ပေနှင့်အထက်ရှိ ကံ့ကော်၊ ခရေ၊ ငုရွှေဝါ၊ ပျဥ်းမ၊ စိန်ပန်းနီ၊ စိန်ပန်းဝါ၊ စိန်ပန်းပြာ၊ တပေဘူတအဝါရောင်၊ တပေဘူတပန်းရောင် အပင်မျိုး(၉)မျိုးပျိုးပင်ပေါင်း (၁၂၂)ပင်အား စုပေါင်း၍စိုက်ပျိုးခဲ့ပါကြောင်းသိရှိရပါသည်။