Welcome to Forest Department
No front page content has been created yet.
သတင်းနှင့်ကြေငြာချက်များ
ချင်းပြည်နယ်အစိုးရအဖွဲ့၏ ကြီးကြပ်မှုဖြင့် (၂၀၂၄ခုနှစ် မြန်မာအမျိုးသမီးများနေ့အကြို) ၂၀၂၄ခုနှစ် မိုးရာသီ သစ်ပင်စိုက်ပျိုးပွဲအခမ်းအနားကို (၂၉-၆-၂၀၂၄) ရက်နေ့၊ နံနက် (၀၉:၀၀) နာရီတွင် ချင်းပြည်နယ်အစိုးရအဖွဲ့ ရုံးဝင်းအတွင်း ကျင်းပပြုလုပ်ခဲ့ရာ ပြည်နယ်ဝန်ကြီးချုပ် ဒေါက်တာဝုန်ဆွန်းထန်နှင့် ဇနီး၊ ပြည်နယ်အစိုးရ အဖွဲ့ဝင်များနှင့် ဇနီးများ၊ ပြည်နယ်၊ ခရိုင်၊ မြို့နယ် ဌာနဆိုင်ရာများ စုစုပေါင်းအင်အား (၂၅၀)တက်ရောက်ခဲ့ပါသည်။ အခမ်းအနားတွင် ပြည်နယ ဝန်ကြီးချုပ်မှ အမှာစကားပြောကြားခဲ့ပြီး ချယ်ရီပင်အားစိုက်ပျိုးခဲ့ပြီး တက်ရောက်လာသူများမှ ချယ်ရီ၊ တောင်ဇလပ်၊ စိန်ပန်းပြာ၊ ရေသင်းဝင်၊ ထင်းရှုး၊ ယူကလစ်၊ မျှင်ဝါး စုစုပေါင်း ပျိုးပင် (၁၄၇၀)ပင်ကို ပြည်နယ်အစိုးရရုံးဝင်း၊ ဟားခါးမြို့ သာသနာ့ဗိဗ္မာန်၊ ဇေတဝန်တောရ ဘုန်းကြီးကျောင်းနှင့် ပြည်နယ်ဆေးရုံဝင်း စုစုပေါင်း (၄)နေရာတွင် စုပေါင်းစိုက်ပျိုးပြီးစီးခဲ့ပါသည်။
မန္တလေးတိုင်းဒေသကြီး၊ အစိုးရအဖွဲ့က ကြီးမှူးကျင်းပသော ၂၀၂၄ ခုနှစ်၊ မိုးရာသီ စုပေါင်း သစ်ပင်စိုက်ပျိုးပွဲအား(၂၉-၆-၂၀၂၄ )ရက်နေ့ (၀၇:၃၀)နာရီအချိန်တွင် မန္တလေးတိုင်း ဒေသကြီး၊ အောင်မြေသာစံခရိုင်၊ ပုသိမ်ကြီးမြို့နယ်၊ နည်းပညာတက္ကသိုလ်(မန္တလေး)ဝင်းအတွင်း၌ ကျင်းပပြုလုပ်ခဲ့ ရာ မန္တလေးတိုင်းဒေသကြီးအစိုးရအဖွဲ့ ဝန်ကြီးချုပ်၊ တိုင်းဒေသကြီး တရားသူကြီးချုပ်၊ တိုင်းဒေသကြီး အစိုးရအဖွဲ့ဝန်ကြီးများနှင့် အစိုးရအဖွဲ့ဝင်များ၊ တက္ကသိုလ်များမှ ပါမောက္ခချုပ်များ၊တိုင်း/ ခရိုင်/ မြို့နယ်အဆင့်ဌာနဆိုင်ရာများ၊ ခရိုင်/မြို့နယ်စီမံအုပ်ချုပ်ရေးအဖွဲ့များ၊ နည်းပညာတက္ကသိုလ် (မန္တလေး)မှပါမောက္ခချုပ်၊ ဒု-ပါမောက္ခချုပ်၊ ဆရာ/ဆရာမနှင့် ကျောင်းသား/ကျောင်းသူများ၊ NGO အဖွဲ့အစည်းများ၊ ဒေသခံပြည်သူများ၊မန္တလေးတိုင်းဒေသကြီး၊ သစ်တောဦးစီးဌာနမှ တိုင်း/ ခရိုင်/ မြို့နယ် သစ်တေါဝန်ထမ်းများ စုစုပေါင်း အင်အား(၆၀၀)ဦးဖြင့် ကျွန်း၊ ပျဉ်းကတိုး၊ ပိတောက်၊ တမလန်း၊ ခရေ၊ ရင်းမာ၊ မဟော်ဂနီ၊ ငုရွှေဝါ၊ စိန်ပန်း၊ မယ်ဇယ်၊ မယ်ဇလီ စသည့် သစ်မျိုး(၁၁)မျိုး၊ စုစုပေါင်း (၆၀၀)ပင်အား စုပေါင်းစိုက်ပျိုးခဲ့ကြောင်း သိရှိရပါသည်။
ပဲခူးတိုင်းဒေသကြီးအတွင်း တည်ထောင်ထားရှိသည့် ကျွန်းစိုက်ခင်းများတွင် ကျရောက်တတ်သည့် ဖျက်ပိုးနှင့်ရောဂါများအား ဘက်ပေါင်းစုံကာကွယ်နှိမ်နင်းခြင်းနည်းလမ်းများဖြင့် စီမံအုပ်ချုပ်ခြင်း စီမံကိန်း၏ ပံ့ပိုးမှုဖြင့် “သစ်တောသင်တန်းကျောင်း များအတွက် ဖျက်ပိုးနှင့် ရောဂါစီမံအုပ်ချုပ်ခြင်း သင်ရိုးညွှန်းတမ်းရေးဆွဲခြင်းဆိုင်ရာ အလုပ်ရုံဆွေးနွေးပွဲ”ကို (၂၈-၆-၂၀၂၄) ရက်နေ့တွင် သစ်တောဦးစီးရုံးချုပ်၊ အင်ကြင်းခန်းမ တွင်ကျင်းပပြုလုပ်ရာသစ်တော ဦးစီးဌာန၊ ညွှန်ကြားရေးမှူးချုပ်ဒေါက်တာသောင်းနိုင်ဦး၊ ဒုတိယညွှန်ကြားရေးမှူးချုပ်များ၊ ညွှန်ကြားရေးမှူးများနှင့် စီမံကိန်းမှ တာဝန်ရှိသူများ၊ ဖိတ်ကြားထားသော ဆက်စပ်ဌာနနှင့် တက္ကသိုလ်ဆရာ/ဆရာမများ တက်ရောက်ကြပြီး ပဲခူးတိုင်းဒေသကြီး၊ သစ်တောဦးစီးဌာနမှ တာဝန်ရှိသူများမှ Virtual စနစ်ဖြင့် တက်ရောက်ကြပါသည်။
သစ်တောဦးစီးဌာန၏ ၂၀၂၄- -၂၀၂၅ ဘဏ္ဍာနှစ်အစည်းအဝေးကို (၂၇-၆- ၂၀၂၄) ရက်နေ့၊ မွန်းလွဲပိုင်းတွင် သစ်တောဦးစီးရုံးချုပ်၊ အစည်းအဝေးခန်းမတွင် ကျင်းပပြုလုပ်ရာ သစ်တောဦးစီးဌာန၊ညွှန်ကြားရေးမှူးချုပ် ဒေါက်တာသောင်းနိုင်ဦး၊ ဒုတိယညွှန်ကြား ရေးမှူးချုပ်များ၊ ဦးစီးရုံးချုပ်ညွှန်ကြားရေးမှူးများနှင့် တာဝန်ရှိသူများ တက်ရောက်ကြပြီး ပြည်နယ်နှင့်တိုင်းဒေသကြီးညွှန်ကြားရေးမှူးများမှ Virtual စနစ်ဖြင့် တက်ရောက်ကြပါသည်။ ရှေးဦးစွာ သစ်တောဦးစီးဌာန၊ ညွှန်ကြားရေးမှူးချုပ်ဒေါက်တာသောင်းနိုင်ဦးက အဖွင့်အမှာစကားပြောကြားပါသည်။ ထို့နောက် ပြည်နယ်/တိုင်းဒေသကြီးနှင့် နေပြည်တော် သစ်တောဦးစီးဌာန ညွှန်ကြားရေးမှူးများမှ ၂၀၂၄- ၂၀၂၅ ဘဏ္ဍာနှစ်၊ ပထမ(၃)လပတ်အတွင်း ရငွေနှင့် သစ်တောထွက်ပစ္စည်းထုတ်လုပ်မှု လျာထားချက်အပေါ်ဆောင်ရွက် ပြီးစီးမှု၊ GDP တိုးတက်မှုနှင့် သစ်တောလုပ်ငန်း လျာထားချက်အပေါ် ဆောင်ရွက်ပြီးစီးမှု ဒုတိယ(၃)လပတ်လျာထားချက်အပေါ် လအလိုက်ဆောင်ရွက်မည့် အစီအမံများကိုလည်းကောင်း ဦးစီးရုံးချုပ်၊ ညွှန်ကြားရေးမှူးများမှ ဌာနအလိုက် ရှင်းလင်းတင်ပြကြပါသည်။တင်ပြချက်များအပေါ် ဒုတိယညွှန်ကြားရေးမှူးချုပ်များက ဖြည့်စွက်ဆွေးနွေးကြပြီး ညွှန်ကြားရေးမှူးချုပ်မှ လိုအပ်သည်များကို လမ်းညွှန်မှုပြုခဲ့ကြောင်းသိရှိရပါသည်။
သစ်တောဦးစီးဌာန လွိုင်လင်မြို့နယ်နှင့်လမ်းဦးစီးဌာန၊ လမ်းအထူးအဖွဲ့-၅တို့ ပူးပေါင်း၍ လွိုင်လင်-ပန်ကေတု-သီပေါလမ်း(၂-၃)ကီလိုမီတာလမ်းနယ်မြေအတွင်း၊ လွိုင်လင်မြို့အထွက်ပင်လုံကွန်ပျူတာတက္ကသိုလ် မျက်နှာစာနေရာ၌ (၂၈.၆.၂၀၂၄)ရက်နေ့တွင် ၂၀၂၄ ခုနှစ်၊ မိုးရာသီစုပေါင်းသစ်ပင်စိုက်ပျိုးပွဲကျင်းပရာ ပင်လုံကွန်ပျူတာတက္ကသိုလ်တာဝန်ခံ ပါမောက္ခချုပ် ဒေါ်မြင့်မြင့်ခိုင်ပါ ဆရာ/ဆရာမ ကျောင်းသား/ကျောင်းသူ(၂၂၀)ဦး၊ လွိုင်လင် ခရိုင် စီမံအုပ်ချုပ်ရေးအဖွဲ့ဥက္ကဋ္ဌ ဦးကံစောလှိုင်ပါ ထွေအုပ်/လမ်းဦးစီး/သစ်တောဝန်ထမ်း (၃၀)ဦး၊ စုစုပေါင်း(၂၅၀)ဦးဖြင့် ချယ်ရီ(၁၅၀)ပင်၊ စိန်ပန်းပြာ(၁၀၀)ပင် စုစုပေါင်း(၂၅၀)ပင် စိုက်ပျိုးခဲ့ပါကြောင်း သိရှိရပါသည်။
ပဲခူးတိုင်းဒေသကြီး၊ ပဲခူးခရိုင်၊ ပဲခူးမြို့နယ်သစ်တောဦးစီးဌာန၏ ဝေါမြို့နယ် အတွင်း၂၀၂၄ ခုနှစ်၊ မိုးရာသီသစ် ပင်စိုက်ပျိုးပွဲတော်အား(၂၇-၆-၂၀၂၄)ရက်နေ့၊ နံနက်(၈)နာရီ အချိန်တွင် ဝေါမြို့နယ်၊ ပြွန်စုကျေးရွာ၊မူလတန်း(လွန်)ကျောင်း မြေကွက်လပ်၌ ကျင်းပ ပြုလုပ်ခဲ့ရာဝေါမြို့နယ်၊ မြို့နယ်စီမံအုပ်ချုပ်ရေးအဖွဲ့ ဥက္ကဌ ဦးမင်းကိုကို ဦးဆောင်သည့် မြို့နယ်အဆင့်ဌာနဆိုင်ရာများ၊ ပြွန်စုကျေးရွာမှဒေသခံ ပြည်သူများ၊ ဆရာ/ဆရာမနှင့်ကျောင်းသား/ ကျောင်းသူများစုစု ပေါင်း(၂၀၀)ဦးတို့မှ ကျောင်းဝန်းအတွင်းအရိပ်ရလေကာပြီး စိမ်းလန်းစိုပြည်သာယာလှပစေရေးအတွက် သစ်တောသစ်ပင်များ အပါအဝင် အရိပ်ရပြီး အပွင့်ပွင့်သည့်သစ်မျိုးများ ပါဝင်သည့် ပျဥ်းကတိုး၊ ပိတောက်၊ ပျဥ်းမ၊ ယေမနေ၊ သပြေကြီး၊ မန်ဂျန်ရှား၊ ခရေ၊ ကံ့ကော်၊ ငုရွှေဝါ၊ စိန်ပန်းကြီး၊ တပေဘူတ၊ အာစီယံသပြေ စသည့် သစ်မျိုး(၁၂)မျိုး၊ ပျိုးပင်ပေါင်း (၁၀၀၀)ပင်အား စုပေါင်း၍စိုက်ပျိုးခဲ့ပါကြောင်း သိရှိရပါသည်။
သစ်တောဦးစီးဌာန၊ ရှမ်းပြည်နယ်(မြောက်ပိုင်း)၊ လားရှိုးခရိုင်၊ လားရှိုးမြို့နယ်၊ လွယ်ငူးကြိုးဝိုင်း၊ ရေကန်တောင်၊ ကန်အမှတ်(၄/၅)အနီး(၂၇.၆.၂၀၂၄)ရက်နေ့ နံနက်(၈:၀၀)တွင် ပြည်နယ်အဆင့်မိုးရာသီ စုပေါင်းသစ်ပင်စိုက်ပျိုးပွဲတော် အခမ်းအနားကျင်းပပြုလုပ်ခဲ့ပါသည်။ အခမ်းအနားတွင် ပြည်နယ်အစိုးရအုပ်ချုပ်ရေးအဖွဲ့ခွဲ(ရှမ်းမြောက်)၊ ဥက္ကဌ ဦးမြင့်သန်းဝင်း၊ ခရိုင်စီမံအုပ်ချုပ်ရေးအဖွဲ့ဥက္ကဌ ဦးမျိုးမင်းထွန်းနှင့် ရှမ်းပြည်နယ် (မြောက်ပိုင်း)၊ သစ်တောဦးစီးဌာနမှ ဒုတိယညွန်ကြားရေးမှူး ဦးသန်းဦးတို့မှ ဦးဆောင်၍ ပြည်နယ်အဆင့်ဌာနဆိုင်ရာများ၊ ခရိုင်အဆင့်ဌာနဆိုင်ရာများ၊ မြို့နယ်အဆင့်ဌာနဆိုင်ရာများ၊ မြန်မာနိုင်ငံရဲတပ်ဖွဲ့၊ သစ်တောလုံခြုံရေးရဲတပ်ဖွဲ့၊ မီးသတ်ဦးစီးဌာန၊ အမျိုးသမီးရေးရာ မိခင်နှင့်ကလေးစောင့်ရှောက်ရေး၊ သူနာပြုသင်တန်းကျောင်း၊ ပတ်ဝန်းကျင်ထိမ်းသိမ်းရေးဦးစီးဌာန၊ တိုင်းရင်းသားယဥ် ကျေးမှုအဖွဲ့များ၊ ဒေသခံပြည်သူများ၊ မြို့မိမြို့ဖများ၊ ကြက်ခြေနီအသင်း၊ သစ်လုပ်ငန်းရှင်များအသင်း၊ လူမှုရေးအသင်းအဖွဲ့များ၊ သစ်တောဦးစီးဌာနမှ ဝန်ထမ်းများစုပေါင်း၍ သစ်ပင်စိုက်ပျိုးခြင်းဆောင်ရွက်ခဲ့ပါသည်။ အဆိုပါသစ်ပင်စိုက်ပျိုးပွဲသို့ လူထုတက်ရောက်အင်အား (၉၀၀)ဦး တက်ရောက်ပြီး မန်ဂျန်ရှား၊ မယ်ဇလီ၊ ရေသင်းဝင်၊ စိန်ပန်းပြာ၊ သင်္ဘောတယ်၊ ခါတော်မှီ၊ ယမနေ၊ ချယ်ရီ၊ ခရေ စုစုပေါင်း(၁၁၀၀)ပင် စိုက်ပျိုးခဲ့ပါကြောင်းနှင့် သစ်ပင်စိုက်ပျိုးပွဲအခမ်းအနားပြီးမှာ ပြည်နယ်အစိုးရအုပ်ချုပ်ရေးအဖွဲ့ခွဲ(ရှမ်းမြောက်)ဥက္ကဌမှ လားရှိုးမြို့နယ်၊ သစ်တောဦးစီးဌာန၏ မြို့မပျိုးဥယျာဉ်အား ကြည့်ရှုစစ်ဆေးခဲ့ပါကြောင်းသိရှိရပါသည်။
သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ သစ်တောဦးစီးဌာနအနေဖြင့် မြန်မာ့ကျွန်းသစ်မူရင်း ဒေသဖြစ်သော ပဲခူးရိုးမအတွင်း ၂၀၁၆-၁၇ ဘဏ္ဍာနှစ်မှစ၍ တရားဝင်သစ်ထုတ်လုပ်ခြင်း လုပ်ငန်းအား (၁၀)နှစ်ရပ်နား ထားပြီး သစ်တောပြုစုထိန်းသိမ်းခြင်းလုပ်ငန်းများအား အရှိန်အဟုန်မြှင့် ဆောင်ရွက်နေလျှက်ရှိသည့်အပြင် တရားမဝင် သစ်ခိုးထုတ်ခြင်း၊ တရားမဝင်တောရိုင်းတိရစ္ဆာန်များ သတ်ဖြတ်ခြင်းနှင့် ကျူးကျော်အခြေချနေထိုင်ခြင်းများအား ပြည်သူပူးပေါင်းပါဝင်မှုဖြင့် စီမံချက်ချအကောင်အထည်ဖော်ဆောင်ရွက်နေလျှက်ရှိပါသည်။ ပဲခူးရိုးမစိမ်းလန်းစိုပြည်ရေး ဧရိယာ အတွင်းမှ (၁၇-၆-၂၀၂၄)ရက်နေ့မှ (၂၃-၆-၂၀၂၄) ရက်နေ့ထိ တစ်ပတ်တာကာလအတွင်း တရားမဝင်ကျွန်း၊ သစ်မာ၊ အခြား စုစုပေါင်း (၂၃.၂၆၆၆) တန်ဖမ်းဆီးရမိခဲ့ပါသည်။