ရှမ်းပြည်နယ်(အရှေ့ပိုင်း)၊ ကျိုင်းတုံ-မိုင်းဆတ် သစ်တောဦးစီးဌာနမှ ကြီးမှူးကျင်းပ သည့် သစ်တောသစ်ပင်နှင့် ဇီဝမျိုးစုံမျိုးကွဲ ထိန်းသိမ်းရေးဆိုင်ရာ အသိပညာပေးဟောပြောပွဲ ကို ဇွန်လ ၂၃ ရက် နံနက် ၉:၃၀ နာရီက ကျိုင်းတုံမြို့ အမေ့ရင်ခွင်ကျောင်းတွင် ကျင်းပသည်။ ဟောပြောပွဲတွင် ကျိုင်းတုံ-မိုင်းဆတ်ခရိုင် သစ်တောဦးစီးဌာနမှ လက်ထောက်ညွှန်ကြားရေး မှူး ဦးအောင်ကျော်ဦးက သစ်တောများနှင့်ရာသီဥတုပြောင်းလဲမှုလျော့ချရေး၊ သစ်တောနှင့် ဇီဝမျိုးစုံမျိုးကွဲများ၊ သစ်တောများနှင့်ရေဝေရေလဲဒေသများထိန်းသိမ်းရေး ဆိုင်ရာသိကောင်း စရာများကိုလည်းကောင်း ကျိုင်းတုံမြို့နယ်သစ်တောဦးစီးဌာနမှ ဦးစီးအရာရှိ ဦးနောဆာဝူက သစ်တောများပြုစုထိန်းသိမ်းခြင်းဖြင့် ရရှိမည့် အကျိုးကျေးဇူးများနှင့် မီးခိုးမြူငွေ့အန္တရာယ် ကာကွယ်လျှော့ချရေးဆိုင်ရာသိကောင်းစရာများကိုလည်းကောင်း သစ်တောသုတေသနဌာန ရေဆင်း နေပြည်တော်မှ ဒုတိယညွှန်ကြားရေးမှူး ဒေါက်တာမူမူအောင်က ဇီဝမျိုးစုံမျိုးကွဲများ ထိန်းသိမ်းကာကွယ်ခြင်းနှင့် သစ်တောများ၏အခန်းကဏ္ဍဆိုင်ရာသိကောင်းစရာများ စသည့် အကြောင်းအရာများကို ကျောင်းသား၊ ကျောင်းသူ(၈၆)ဦးအား အသိပညာပေးဟောပြော ခဲ့ပြီး သစ်တောသစ်ပင်နှင့် ဇီဝမျိုးစုံမျိုးကွဲ ထိန်းသိမ်းရေးဆိုင်ရာ အသိပညာပေး လက်ကမ်း စာစောင်များ ဖြန့်ဝေပေးသည်။ ထို့‌နောက် အမေ့ရင်ခွင်ကျောင်းတော်တည်ထောင်သူ ဦးမင်းညို၊ အဖွဲ့ဝင်(အဖွဲ့ဝင်၂)၊ ပြည်နယ်အစိုးရအုပ်ချုပ်ရေးအဖွဲ့ခွဲ(ရှမ်းအရှေ့)က ကျေးဇူး တင်စကားပြောကြားကြောင်း သိရှိရပါသည်။

မျိုးဆက်သစ်လူငယ်များအား ရာသီဥတုပြောင်းလဲမှု တိုက်ဖျက်ရေးနှင့် ဇီဝမျိုးစုံမျိုးကွဲ ထိန်းသိမ်းရေးတွင် သစ်တောများ၏ အရေးကြီးသည့် အခန်းကဏ္ဍကို နားလည်စေရန်၊ သစ်တောနှင့် သဘာဝ ပတ်ဝန်းကျင်ဆိုင်ရာ အတွေးအမြင်များကို မြှင့်တင်ရန်နှင့် AFoCO RETC ကို လေ့လာ စေပြီး၊ နိုင်ငံတကာနှင့် သစ်တောဆိုင်ရာ ပူးပေါင်းဆောင်ရွက်မှုများကို သိရှိစေရန် ရည်ရွယ်၍ ‘သစ်တောနှင့် သဘာဝပတ်ဝန်းကျင်ဆိုင်ရာ တိုးချဲ့ ပညာပေးခြင်း (eco-school)’ကို ၂၀၂၄-၂၀၂၅ ဘဏ္ဍာနှစ်၏ ပထမအကြိမ်အဖြစ် AFoCO RETC သင်တန်းကျောင်းတွင် ၂၀၂၄ ခုနှစ်၊ ဇွန်လ ၂၀ ရက်နေ့ နံနက် ၀၉:၀၀ နာရီမှ နေ့လည် ၁၂:၃၀ နာရီအထိ ကျင်းပခဲ့ပါသည်။ အဆိုပါ Eco-school အစီအစဉ်သို့ အမှတ်(၁)၊ အခြေခံပညာ အထက်တန်းကျောင်း၊ မင်္ဂလာဒုံမြို့နယ်မှ ကျောင်းသူ/သား (၉၀)ဦးတက်ရောက်ခဲ့ပြီး ကျောင်းသူ/သားများအား သစ်တော နှင့်ပတ်ဝန်းကျင်ထိန်းသိမ်းရေးဆိုင်ရာ ဟောပြောခြင်း၊ RETC သင်တန်းကျောင်း၊ ပညာပေးပြခန်း၊ လေ့ကျင့်ရေးသစ်တောနှင့် သစ်တောပျိုးဥယျာဉ်တို့အား လေ့လာစေခြင်းနှင့် သစ်ပင်စိုက်ပျိုးခြင်း နည်းလမ်းများ ရှင်းလင်းဆောင်ရွက်ခဲ့ပါသည်။ ထို့နောက် လေ့လာခဲ့သည့်အကြောင်းအရာများကို အုပ်စုဖွဲ့၍ ယှဉ်ပြိုင်ဖြေဆိုစေခြင်းများ ဆောင်ရွက်လျက် ဆုလက်ဆောင်ချီးမြှင့်ကာ တက်ရောက်သူ ကျောင်းသူ/သားတစ်ဦးချင်းစီအား အမှတ်တရလက်ဆောင်များ ပေးအပ်ခဲ့ပါသည်။

နိုင်ငံတော်အကြီးအကဲ၏ လမ်းညွှန်မှုအရ မွန်ပြည်နယ် သစ်တောဦးစီးဌာန၏ စီစဉ်ကြီးကြပ်မှုဖြင့် ၂၀၂၄ ခုနှစ်၊ မိုးရာသီကျေးရွာသုံးထင်းစိုက်ခင်း(၂)ဧကတည်ထောင် စိုက်ပျိုးပွဲ အခမ်းအနားအား ၂၂-၆-၂၀၂၄ ရက်နေ့ နံနက် (၀၇:၃၀)နာရီအချိန်တွင် သထုံခရိုင်၊ ပေါင်မြို့နယ်၊ သဲဖြူကုန်းကျေးရွာ အုပ်စု၊ ရဲပြားကုန်းကျေးရွာအနီး မလတ်တောင်ခြေမြေ နေရာ၌ ကျင်းပပြုလုပ်ခဲ့ရာ မွန်ပြည်နယ်အစိုးရအဖွဲ့ ပြည်နယ်ဝန်ကြီးချုပ်နှင့် အစိုးရအဖွဲ့ဝင်များ၊ ပြည်နယ်/ခရိုင်/မြို့နယ်အဆင့် ဌာနဆိုင်ရာများ၊ သစ်တောဦးစီးဌာနမှဝန်ထမ်းများ၊ လူမှုရေးအသင်းအဖွဲ့များ၊ ကျောင်းသား/သူများ၊ ဒေသခံပြည်သူများ စုစုပေါင်းအင်အား (၄၃၀)ဦး တက်ရောက်ခဲ့ကြပြီး မန်ဂျန်ရှားပျိုးပင် (၂၄၂၀)ပင်အား စိုက်ပျိုးခဲ့ကြကြောင်း သိရှိရပါသည်။