ရန်ကုန်တိုင်းဒေသကြီး ၊ ရန်ကုန် မြောက်ပိုင်းခရိုင်၊ အင်းစိန်မြို့နယ် သစ်တောဦးစီးဌာနသည် နွေရာသီကျောင်းပိတ်ရက်၌ ကျောင်းသား/ ကျောင်းသူများအား “သစ်တောနှင့် ဇီဝမျိုးစုံမျိုးကွဲထိန်းသိမ်းရေးဆိုင်ရာ အသိပညာပေးဟောပြောပွဲ”ကို (၇-၅-၂၀၂၄)ရက်နေ့၊ နံနက် (၁၀:၀၀) နာရီတွင် အင်းစိန်မြို့နယ်၊ စော်ဘွားကြီး ကုန်းရပ်ကွက်၊ အမှတ်(၈) အခြေခံပညာအထက်တန်းကျောင်း၊ ဧဝရက်ခန်းမတွင်ကျင်းပပြုလုပ်ရာ ကျောင်းအုပ်ဆရာမကြီး ဒေါ်ချိုချိုစန်းနှင့် ဆရာ/ ဆရာမ၊ ကျောင်းသား/ ကျောင်းသူ စုစုပေါင်း (၁၃၅) ဦး တက်ရောက်ခဲ့ကြပြီး လက်ထောက်ညွှန်ကြားရေးမှူး ဦးမျိုးနိုင်က သစ်တောသစ်ပင်နှင့် ဇီဝမျိုးစုံမျိုးကွဲ များထိန်းသိမ်းရေးဆိုင်ရာများ၊ သစ်တောများနှင့်ရာသီဥတု ပြောင်းလဲမှုလျော့ချရေးဆိုင်ရာ များကိုလည်းကောင်း၊ ဦးစီးအရာရှိ ဦးအောင်ဝင်းကျော်က သစ်တောများနှင့် ရေဝေရေလဲဒေသများထိန်းသိမ်းခြင်းနှင့် သစ်တောများမှပေးစွမ်းနိုင်သော အကျိုး ကျေးဇူးများကို လည်းကောင်း အသိပညာပေးဟောပြောခဲ့ပြီး အသိပညာပေးလက်ကမ်း စာစောင်များကို သစ်တောဦးစီးဌာန ဝန်ထမ်းများကဖြန့်ဝေပေးခဲ့ကြသည်။

၆-၅-၂၀၂၄ ရက်နေ့၊ နံနက်(၁၀:၀၀)နာရီတွင် သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဌာန၊ သစ်တောဦးစီးဌာန၊ ညွှန်ကြားရေးမှူးချုပ်ရုံး၊ အင်ကြင်းခန်းမ၌ ပြည်ပနိုင်ငံများသို့ သွားရောက်ခဲ့ပြီး ပြန်လည်ရောက်ရှိလာသောဝန်ထမ်းများမှ အတွေ့အကြုံရှင်းလင်းခြင်း အစီအစဉ်ကို ကျင်းပပြုလုပ်ခဲ့ရာ ညွှန်ကြားရေးမှူးချုပ်ရုံးမှ အရာထမ်း၊ အမှုထမ်းများ တက်ရောက်ခဲ့ပါသည်။ ဒေါက်တာအိအိဆွေလှိုင်(လက်ထောက်ညွှန်ကြားရေးမှူး)မှ သဘာပတိအဖြစ်ဆောင်ရွက်ခဲ့ပြီး၊ အစီအစဉ်အရ ဒေါက်တာ ဆုစန္ဒာအောင်(ဦးစီးအရာရှိ)သဘာဝဝန်းကျင်နှင့်သားငှက်တိရစ္ဆာန်ထိန်း သိမ်းရေးဌာနက ကမ္ဘောဒီးယားနိုင်ငံတွင်ကျင်းပသည့် အင်ဒို-မြန်မာဒေသတွင်း ရမ်ဆာရေဝပ်ဒေသ ပူးပေါင်းဆောင်ရွက်မှု (Indo-Burma Ramsar Regional Initiatives-IBRRI)၏ သတ္တမကြိမ်မြောက် ဦးစီးကော်မတီ အစည်းအဝေးနှင့် နှစ်ပတ်လည်အစည်းအဝေးသို့ တက်ရောက်ခြင်းအားလည်းကောင်း၊ ဦးစိန်ဝေလျှံ (ဦးစီးအရာရှိ)က အမေရိကန် University of the People တွင် ကျင်းပသည့် စီးပွားရေးလုပ်ငန်း စီမံခန့်ခွဲမှုဆိုင်ရာ မဟာသိပ္ပဲဘွဲ့သင်တန်းတက်ရောက်ခဲ့သည် အတွေ့အကြုံ ဗဟုသုတများကို ရှင်းလင်းဆွေးနွေးခြင်းအားလည်းကောင်း ဆောင်ရွက်ခဲ့ရာ တက်ရောက်လာသူ များမှ အပြန်အလှန် ဆွေးနွေးခဲ့ကြပါသည်။

သယံဇာတနှင့်သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ သစ်တောဦးစီးဌာနအနေဖြင့် နွေရာသီကျောင်းပိတ်ရက်ရှည်ကာလအတွင်းကျောင်းသား/သူလူငယ်များ မိမိတို့ဝန်းကျင်ရှိ သစ်တောသစ်ပင်နှင့်ဇီဝမျိုးစုံမျိုးကွဲများကို ချစ်မြတ်နိုး တတ်စေရန် နှင့် လက်ရှိ ရာသီဥတုပြောင်းလဲမှုဖြစ်စဉ်များ၏ အခြေခံအကြောင်းအရင်းများကို သိရှိနားလည်တန်ဖိုး ထားတတ်စေရန် ရည်ရွယ်၍ အသိပညာပေး ဟောပြောပွဲများ ဆောင်ရွက်လျက်ရှိရာ သင်္ဃန်းကျွန်းမြို့နယ် သစ်တောဦးစီးဌာနသည် သစ်တောနှင့် ဇီဝမျိုးစုံမျိုးကွဲများ ထိန်းသိမ်းရေးဆိုင်ရာ အသိပညာပေး ဟောပြောပွဲကို(၃.၅.၂၀၂၄)ရက်နေ့ နံနက်ပိုင်း၌ ဒဂုံမြို့သစ်(အရှေ့ပိုင်း)မြို့နယ် အမှတ်(၁) အခြေခံ ပညာအထက်တန်းကျောင်း၊ စုဝေးခန်းမတွင် ဟောပြော ဆောင်ရွက်ခဲ့ရာ ဆရာ/ဆရာမ ကျောင်းသားကျောင်းသူအင်အား (၈၀)ဦးတက်ရောက်ခဲ့ကြပါသည်။ ထို့နောက် သင်္ဃန်းကျွန်း မြို့နယ် ရွာသာကြီးအမြဲတမ်းပျိုးဥယျာဉ်အတွင်း ပျိုးထောင်ထားရှိသော ပျိုးပင်များ စံနစ်တကျ ပြုစုပျိုးထောင် ခြင်းနှင့်နည်းလမ်း တကျသစ်ပင် စိုက်ပျိုးခြင်း အခြေခံနည်းစနစ်တို့ကို သရုပ်ပြ ရှင်းလင်းပြသခြင်းများ ဆောင်ရွက်ခဲ့ရာ ကျောင်းသား/ကျောင်းသူများက သိရှိလိုသည်များ မေးမြန်းခြင်း နှင့် သစ်တောဝန်ထမ်းများက ပြန်လည် ရှင်းလင်းဖြေကြားခြင်းများ ဆောင်ရွက်ခဲ့ ပါကြောင်း သိရှိရပါသည်။