နေပြည်တော်ကောင်စီနယ်မြေ၊ မာရဝိဇယဗုဒ္ဓရုပ်ပွားတော်မြတ်ကြီး ပရဝုဏ်အတွင်း (၁၅-၁၁-၂၀၂၄) ရက်နေ့၌ ကျင်းပသည့် ၂၀၂၄ ခုနှစ်၊ မီးပုံးပျံလွှတ်တင်ပူဇော်ယှဥ်ပြိုင်ခြင်းဆုချီးမြှင့်ပွဲ အခမ်းအနားသို့ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာနမှ "စိမ်းလန်းမြေ" မီးပုံးပျံအဖွဲ့ တက်ရောက်ခဲ့ပြီး အဆိုပါအခမ်းအနားတွင် သစ်တောဦးစီးဌာန၊ညွှန်ကြားရေးမှူး ချုပ်၊ဒေါက်တာသောင်းနိုင်ဦး၏ ဦးဆောင်မှုဖြင့် "စိမ်းလန်းမြေ" မီးပုံးပျံအဖွဲ့မှ တေးသီချင်းများ၊ဆင်အကအလှများဖြင့် ဘုရားဖူးလာပြည်သူများအားပျော်ရွှင်စွာပါဝင်ဖျော်ဖြေခဲ့ကြသည်။
ဆက်လက်၍ ဆုချီးမြှင့်ခြင်းအစီအစဥ်တွင်"စိမ်းလန်းမြေ" မီးပုံးပျံအား "စက္ခုပသာဒအကောင်းဆုံးဆု" ချီးမြှင့်ရရှိခဲ့ရာ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ ပြည်ထောင်စုဝန်ကြီး၊ အမြဲတန်းအတွင်းဝန်နှင့် သစ်တောဦးစီးဌာန၊ ညွှန်ကြားရေးမှူးချုပ်တို့မှ ပျော်ရွှင်စွာ လက်ခံရယူခဲ့ကြကြောင်း သိရှိရသည်။ ထို့နောက် ဆုချီးမြှင့်ခြင်း အခမ်းအနားပြီးဆုံးချိန်တွင်သစ်တောဦးစီးဌာန၊ ညွှန်ကြားရေးမှူးချုပ်၊ဦးဆောင်သော "စိမ်းလန်းမြေ" မီးပုံးပျံအဖွဲ့မှ မာရဝိဇယဘုရားပရဝုဏ်သန့်ရှင်းလှပစေရေးအတွက် စွန့်ပစ်ကျန်ရစ်သည့်ပလပ်စတစ်ဘူးများ၊ ကြွတ်ကြွတ်အိတ်များစသည့် စွန့်ပစ်ပစ္စည်းများအား စနစ်တကျ ကူညီသိမ်းဆည်းပေးခဲ့ကြကြောင်းသတင်းရရှိပါသည်။

သရက်ခရိုင်၊ သရက်မြို့နယ် မြန်မာအမျိုးသမီးများနေ့အထိမ်းအမှတ်နှင့် ၂၀၂၄ ခုနှစ်၊ မိုးရာသီသစ်ပင်စိုက်ပျိုးပွဲတော်အား (၃.၇.၂၀၂၄) ရက်နေ့တွင် သရက်မြို့၊ အစိုးရစက်မှုလက်မှု သိပ္ပံကျောင်းဝင်းအတွင်းကျင်းပခဲ့ပါသည်။ သရက်တပ်နယ်မှူးမှ ကြွရောက်အဖွင့်အမှာစကား ပြောကြားခဲ့ပြီး တမာ(၁၂၅)ပင်၊ ရေတမာ(၁၂၅)ပင်၊ ပိတောက်(၁၀၀)ပင်၊ မယ်ဇလီ(၇၅)ပင်၊ မြန်မာကုက္ကိုလ်(၅၅)ပင်၊ ယင်းမာ(၁၀)ပင်၊ ဖျောက်ဆိပ်(၁၀)ပင် သစ်မျိုး(၇)မျိုး အပင်ပေါင်း (၅၀၀)ပင်အား တပ်နယ်မှူးမှ ဦးဆောင်၍ သရက်ခရိုင်စီမံအုပ်ချုပ်ရေးအဖွဲ့ ဥက္ကဌနှင့် အဖွဲ့ဝင်များ၊ ခရိုင်/မြို့နယ်အဆင့်ဌာနဆိုင်ရာများ၊ လူမှုရေးအသင်းအဖွဲ့များနှင့် ဆရာ/ ဆရာမများ၊ ကျောင်းသားကျောင်းသူများ စုစုပေါင်းအင်အား(၃၂၅)ဦးမှ စုပေါင်းစိုက်ပျိုးခဲ့ကြ ကြောင်း သိရှိရပါသည်။

သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ သစ်တောဦးစီးဌာန အနေဖြင့် မြန်မာ့ကျွန်းသစ်မူရင်း ဒေသဖြစ်သော ပဲခူးရိုးမအတွင်း ၂၀၁၆-၁၇ ဘဏ္ဍာနှစ်မှ စ၍ တရားဝင် သစ်ထုတ်လုပ်ခြင်းလုပ်ငန်းအား (၁၀)နှစ်ရပ်နားထားပြီး သစ်တောပြုစုထိန်းသိမ်းခြင်းလုပ်ငန်းများအား အရှိန်အဟုန်မြှင့်ဆောင်ရွက်နေလျှက်ရှိသည့်အပြင် တရားမဝင် သစ်ခိုးထုတ်ခြင်း၊ တရားမဝင်တောရိုင်းတိရစ္ဆာန်များ သတ်ဖြတ်ခြင်းနှင့် ကျူးကျော်အခြေချ နေထိုင်ခြင်းများအား ပြည်သူပူးပေါင်းပါဝင်မှုဖြင့် စီမံချက်ချအကောင်အထည်ဖော်ဆောင်ရွက်နေလျှက်ရှိပါသည်။ ပဲခူးရိုးမစိမ်းလန်းစိုပြည်ရေး ဧရိယာအတွင်းမှ (၁၆-၉-၂၀၂၄)ရက်နေ့မှ (၂၂-၉-၂၀၂၄) ရက်နေ့ထိ တစ်ပတ်တာကာလအတွင်း တရားမဝင်ကျွန်း၊ သစ်မာ၊ အခြား စုစုပေါင်း (၃၉.၀၆၂၅) တန်ဖမ်းဆီးရမိခဲ့ပါသည်။